Gujarati News

નવી દિલ્હી,તા.૧૫: એડ્કસ્ટેડ ગ્રોસ રેવન્યુ (AGR)ને કારણે બીજા કવાર્ટરમાં વોડાફોન આઈડિયાને રૂ. ૫૦,૯૨૧ કરોડનું નુકસાન થયું છે. આ અગાઉ ગયા વર્ષના બીજા કવાર્ટરમાં કંપનીને રૂ. ૪,૯૪૭ કરોડનું નુકસાન થયું હતું. ભારતના કોર્પોરેટ ઇતિહાસમાં આ અત્યાર સુધીની સૌથી મોટી ત્રિમાસિક ખોટ છે.

અગાઉ ટાટા મોટર્સને ડિસેમ્બર ૨૦૧૮માં  પૂરા થયેલા કવાર્ટરમાં ૨૬,૯૬૧ કરોડ રૂપિયાનું નુકસાન થયું હતું. વોડાફોને કહ્યું કે હવે તે ધંધો ચાલુ રાખવા સરકારની રાહત પર આધારિત છે. કંપનીએ એક નિવેદનમાં કહ્યું, “AGR મુદ્દે કોર્ટના આદેશથી ઉદ્યોગને નોંધપાત્ર અસર થઈ છે.”

ટ્રાઇના ૧૯ ઓકટોબરે જાહેર કરેલા ડેટા મુજબ વોડાફોન આઇડિયાની પાસે ૩૭.૫ કરોડ ગ્રાહક છેે. જ્યારે એરટેલની પાસે ૩૨.૭૯ કરોડ ગ્રાહક છે. બીજી બાજુ રિલાયન્સ જિયોની પાસે ૩૪.૮ કરોડ ગ્રાહક છે. એટલે એ રીતે જોઇએ તો વોડાફોન આઇડિયા અને એરટેલની પાસે સંયુકત રીતે ૭૦ કરોડથી વધુ ગ્રાહક છે. તેથી ૭૦ કરોડથી વધુ ગ્રાહકોને અસર થશે

પરિણામ જાહેર થયાના આગલા દિવસે જ આદિત્ય બિરલા ગ્રૂપે કહ્યું હતું કે જો સરકાર એડજસ્ટેડ ગ્રોસ રેવન્યુ (AGR) પર ૩૯,૦૦૦ કરોડ રૂપિયાથી વધુની જવાબદારી પર મોટી રાહત નહીં આપે તો તે કંપનીમાં વધુ રોકાણ કરશે નહીં. આવી સ્થિતિમાં, વોડાફોન આઈડિયા નાદાર થઈ જશે. અમને જણાવી દઈએ કે AGR અંગે સુપ્રીમ કોર્ટનો નિર્ણય ગયા મહિને આવ્યો હતો. ત્યારબાદ પહેલીવાર આદિત્ય બિરલા ગ્રુપના અધિકારીઓએ કંપનીને નાદાર જાહેર કરવાના વિકલ્પ પર જાહેર નિવેદન આપ્યું છે.

જૂથના અધિકારીનું કહેવું છે કે તે વોડાફોન ગ્રુપના સીઇઓ નિક રીડના નિવેદન સાથે સંમત છે. વોડાફોન ચીફ એકિઝકયુટિવ (સીઇઓ) નિક રીડે કહ્યું હતું કે ભારત 'ઘણા સમયથી ખૂબ જ પડકારજનક છે', પરંતુ વોડાફોન આઈડિયાના હજી પણ ૩૦૦ મિલિયન ગ્રાહકો છે જે બજારના કદના આધારે ૩૦ ટકા છે. તેમણે કહ્યું કે, પ્રતિકૂળ નિયમો, અતિશય કર અને સુપ્રીમ કોર્ટના નકારાત્મક ચુકાદાને કારણે કંપની પર મોટો આર્થિક બોજો છે.

સુપ્રીમ કોર્ટના બાકી ચૂકવવાના આદેશથી ભારતી એરટેલને મોટો ઝટકો લાગ્યો છે. ગુરુવારે જાહેર થયેલા પરિણામો મુજબ, ટેલિકોમ કંપનીને જુલાઈ-સપ્ટેમ્બર, ૨૦૧૯ના ત્રિમાસિક ગાળામાં રૂપિયા ૨૩,૦૪૫ કરોડનું મોટું નુકસાન થયું છે. એક વર્ષ પહેલા આ જ કવાર્ટરમાં કંપનીને રૂ. ૧૧૯ કરોડનો નફો થયો હતો. જો કે, કંપનીએ કહ્યું કે નવી એકાઉન્ટિંગ સિસ્ટમના કારણે પરિણામોની તુલના કરી શકાતી નથી.

ગુરુવારે, વોડાફોન-આઈડિયાના શેરમાં ૨૨ ટકાનો દ્યટાડો થયો હતો. દ્યટાડા પછી તે ૧૮.૯૨ ટકા એટલે કે ૦.૩૦ પોઇન્ટના દ્યટાડા પછી ત્રણ રૂપિયાના સ્તરે બંધ રહ્યો છે. શરૂઆતના સમયમાં ૩.૩૫ પર ખુલ્યો હતો, જયારે વોડાફોન આઈડિયાના શેર અગાઉના ટ્રેડિંગ દિવસે ૩.૭૦ પર બંધ થયા હતા.

આદિત્ય બિરલા ગ્રૂપે જણાવ્યું હતું કે જો સરકાર એડજસ્ટેડ ગ્રોસ રેવન્યુ (એજીઆર) પર ૩૯,૦૦૦ કરોડ રૂપિયાથી વધુની તેની જવાબદારીને મોટી રાહત નહીં આપે તો વોડાફોન-આઈડિયાના શેરમાં તીવ્ર દ્યટાડો થશે. આવી સ્થિતિમાં, વોડાફોન આઈડિયા નાદાર થઈ જશે.