Gujarati News

નવી દિલ્હી: દેશમાં પેટ્રોલ અને ડીઝલની કિંમત રોજેરોજ નવો રેકોર્ડ બનાવી રહી છે. જોકે, સમગ્ર દેશમાં પેટ્રોલ અને ડીઝલની કિંમતો રાજ્યો તેમજ શહેરોમાં જુદી-જુદી છે. તેનું કારણ એ છે કે, દેશમાં તમામ જગ્યાએ કેન્દ્ર સરકારના ટેક્સ તો સરખા જ હોય છે, પરંતુ રાજ્ય સરકારો દ્વારા લેવાતા જુદા-જુદા વેટને કારણે પેટ્રોલ અને ડીઝલની કિંમત અલગ-અલગ હોય છે.

ભારતમાં પેટ્રોલની કિંમત ઘણી બધી વાતો પર આધાર રાખે છે. તમે પેટ્રોલ પંપ પર જે રૂપિયા ચૂકવો છો, તેના કરતા પેટ્રોલ અને ડીઝલની કિંમત ઘણી ઓછી હોય છે. પ્રતિ લિટર પેટ્રોલ પર તમે એક્સાઈઝ ડ્યૂટી, રાજ્ય સરકારનો વેટ, ડીલરનું કમિશન તેમજ ટ્રાન્સપોર્ટેશન કોસ્ટ પણ ચૂકવો છો, જેના કારણે આમ સસ્તું કહી શકાય તેવા પેટ્રોલની લગભગ બમણી કિંમત તમારે ચૂકવવી પડે છે.

દેશભરમાં હાલ સૌથી મોંઘુ પેટ્રોલ મહારાષ્ટ્રના પરભણીમાં મળે છે. અહીં વેટોનો રેટ સૌથી વધુ હોવાથી અત્યારે અહીં પેટ્રોલનો ભાવ 90 રૂપિયા પ્રતિ લિટર કરતા પણ વધારે છે. ત્યાર પછી મુંબઈનો નંબર આવે છે, જ્યાં પેટ્રોલની કિંમત રૂ. 88.67ની આસપાસ છે. જોકે, ભારતમાં સૌથી ઓછો વેટ ક્યાં લેવાય છે અને તેના કારણે સૌથી સસ્તા ભાવમાં પેટ્રોલ અને ડીઝલ ક્યાં મળે છે તે માહિતી પણ રસપ્રદ છે.

ચારેય તરફ દરિયાથી ઘેરાયેલા પોર્ટબ્લેર કે જે આંદામાન નિકોબારની રાજધાની છે, ત્યાં પેટ્રોલનો ભાવ સૌથી ઓછો છે. પોર્ટ બ્લેરમાં પેટ્રોલ 69.97 પૈસા પ્રતિ લિટર વેચાય છે, મતલબ કે મુંબઈથી 18 રૂપિયાથી પણ ઓછા ભાવે. પોર્ટ બ્લેરમાં પેટ્રોલ અને ડીઝલ પરનો વેટ માત્ર છ ટકા છે. જ્યારે, મુંબઈમાં પેટ્રોલ પર 39.12 ટકા વેટ લાગે છે. શહેરમાં ડીઝલની હાલની કિંમત 77.82 રૂપિયા પ્રતિ લિટર છે.

જોકે, પોર્ટ બ્લેરમાં ડીઝલનો ભાવ માત્ર 68.58 રૂપિયા પ્રતિ લિટર ચાલી રહ્યો છે. પેટ્રોલ પર વેટનો દર વધારે હોય તેનો અર્થ એ નથી કે, ડીઝલ પર પણ વેટ એટલો જ લાગતો હોય. દેશમાં ડીઝલ પર સૌથી વધુ વેટ અત્યાર સુધી આંધ્રપ્રદેશમાં લેવાતો હતો, જેનું પ્રમાણ હતું 28.08 ટકા. જોકે, ચાર દિવસ પહેલા જ સરકારે તેમાં બે ટકાનો ઘટાડો કર્યો હતો. હાલ તેલંગાણામાં ડીઝલ પર સૌથી વધુ 26.01 ટકા વેટ લેવાય છે.

આપણે ત્યાં માત્ર સરકારી જ નહીં, પ્રાઈવેટ કંપનીઓના પણ પેટ્રોલ પંપ આવેલા છે, જેમાં રિલાયન્સ, એસ્સાર તેમજ શેલનો સમાવેશ થાય છે. જોકે, દેશમાં પેટ્રોલિયનમનું 90 ટકા માર્કેટ સરકારી કંપનીઓના કબજામાં છે. તમે પ્રાઈવેટ કંપનીના પેટ્રોલપંપ પરથી પેટ્રોલ કે ડીઝલ ભરાવો તો શક્ય છે કે તમારે વધારે પૈસા પણ ચૂકવવા પડે.

ભારતમાં સૌથી સસ્તું પેટ્રોલ પોર્ટ બ્લેરમાં મળે છે, જેની કિંમત 69.97 રૂપિયા પ્રતિ લિટર છે. ત્યાર પછી પણજી (રૂ. 74.97) અને ત્રીજા નંબરે ઈટાનગર (રૂ. 76.97) આવે છે. જ્યારે સૌથી સસ્તું ડીઝલ પોર્ટ બ્લેરમાં (રૂ. 68.58), ઈટાનગરમાં (રૂ.70.44) અને ઐઝવાલમાં (રૂ.70.53)માં વેચાય છે.

સૌથી ઉંચા ભાવે પેટ્રોલ મળતું હોય તેવાં શહેરમાં મુંબઈ પહેલા નંબરે છે, જ્યારં 83.67 રૂપિયા પ્રતિ લિટર ભાવ ચાલી રહ્યો છે. ત્યાર બાદ પટણા (રૂ. 87.46) અને પછી ભોપાલ (રૂ. 87 પ્રતિ લિટર)નો સમાવેશ થાય છે. દેશમાં ડીઝલનો સૌથી વધુ ભાવ શિલોંગમાં (રૂ. 83.67), કોલકાતા (રૂ. 83.14) અને પછી હૈદરાબાદમાં (રૂ. 79.73) પ્રતિ લિટર છે.