Gujarati News

નવી દિલ્હી:આ વર્ષના ઓગસ્ટ મહિનામાં કુલ 50 સોદામાં 1.6 અબજ અમેરિકન ડોલરની કિંમતના વિક્રમ રોકાણ નોંધાયાં હતાં, પાછલા વર્ષના સમાન ગાળાની સરખામણીએ જોઈએ તો મૂલ્યના સંદર્ભમાં સોદા બમણા કરતાં વધારે હતા, તેમ એક EY અહેવાલ જણાવે છે.

ઓગસ્ટ 2018 સુધીમાં પ્રાઇવેટ ઇક્વિટી તથા વેન્ચર કેપિટલ ઇન્વેસ્ટમેન્ટ્સ 18.7 અબજ ડોલરને પાર કરી ગયું હતું જે પાછલા વર્ષના સમાન ગાળાની સરખામણીએ નવ ટકા ઊંચું હતું, તેમ ગુરુવારે પ્રસિદ્ધ થયેલા EYના પ્રાઇવેટ ઇક્વિટી મંથલી ડીલ ટ્રેકર રિપોર્ટમાં જણાવવામાં આવ્યું હતું. અહેવાલ અનુસાર ઓગસ્ટ 2018માં 18 એક્ઝિટમાં 83 કરોડ ડોલરનો આંક નોંધાયો હતો.

પ્રાઇવેટ ઇક્વિટી સર્વિસિસ, EYના પાર્ટનર તથા નેશનલ લીડર વિવેક સોનીએ જણાવ્યું હતું કે, પીઇ-વીસી પ્રવૃત્તિએ ઓગસ્ટ 2018 દરમિયાન 1.6 અબજ ડોલરના અમેરિકન ડોલરના રોકાણ સાથે તેની મજબૂત દોડ જાળવી રાખી હતી. ઓગસ્ટના અંત સુધીમાં ભારત તરફનું સેન્ટિમેન્ટ મજબૂત જળવાઈ રહ્યું હતું. આ મહિના દરમિયાન ફંડ્સ દ્વારા બે અબજ ડોલર એકત્ર કરવામાં આવ્યા હતા તેમાંથી પુરાવો મળે છે જે ભારતમાં રોકાણ માટે ઉપલબ્ધ 40 અબજ ડોલર જેટલા ઉચ્ચ કક્ષાના ભંડોળમાં ઉમેરો કરે છે.

ભારતીય PE/VC ઉદ્યોગ હવે પરિપક્વ થયેલો દેખાય છે. તેની સાથે PE/VCનું પીઠબળ ધરાવતું પ્લેટફોર્મ મોટા વૈશ્વિક રોકાણકારો જેવા કે બર્કશાયર હેથવેને આકર્ષિત કરી રહ્યું છે, જેણે તાજેતરમાં પેટીએમમાં 30-40 કરોડ ડોલરનું રોકાણ કરવાની જાહેરાત કરી હતી તેમ તેમણે કહ્યું હતું.