Gujarati News

કેન્યામાં વસતા નરેન્દ્ર રાવલ (ઉ,વ,56) ગુરુ નામથી વધુ જાણીતા છે.નરેન્દ્ર જાણીતા જ્યોતિષકાર ઉપરાંત કેન્યાના ટોપના બિઝનેસમેન પણ છે. તેમન સમાવેશ એકલા કેન્યા નહીં પણ સમગ્ર આફ્રિકાના સૌથી ધનવાનમાં થાય છે.મૂળ સુરેન્દ્રનગરના માથક ગામના નીવાસી કેન્યાના અનેક રાષ્ટ્રપતિના ખાસ જ્યોતિષી તેમજ સલાહકાર રહ્યા છે. આ સાથે જ તેમની દેવકી ગ્રુપ ઓફ કંપનીઝ પણ વિશાળ કારોબાર ધરાવે છે. તેમની કંપની સમગ્ર આફ્રિકામાં સ્ટીલ અને સિમેન્ટમાં રોકાણ કરે છે.

   ગુરુ ઉર્ફે રાવલે તાજેતરમાં જ પોતાની ઓટોબાયોગ્રાફી ‘ગુરુઃ અ લોંગ વૉક ટુ સક્સેસ’ લોંચ કરી છે. આ બુકમાં તેમણે જણાવ્યું કે 1983માં કેન્યમાં પહેલીવાર તેમને તત્કાલીન પ્રેસિડેન્ટને ડેનિયલ આર્પ મોઈને મળવાનું થયું હતું. જે બાદ તેમના સંબંધો સતત વધુને વધુ મજબૂત બનતા ગયા. બૂકમાં રાવલે લખ્યું છે કે, ‘મે તેમની સાથે હસ્તરેખા શાસ્ત્રનો મારો અનુભવ શેર કર્યો જે બાદ તેમણે મને પોતાના સત્તાવાર નિવાસસ્થાને આવવાનું આમંત્રણ આપ્યું હતું.’ 

   નરેન્દ્ર રાવલ ધીરે ધીરે રાષ્ટ્રપતિના પોલિટિકલ એડવાઇઝર બની ગયા. પ્રેસિડેન્ટ ડેનિયલ બાદ પણ તેઓ પ્રેસિડેન્ટ કિબાકી માટે પણ સલાહકાર તરીકે રહ્યા હતા. તેમણે અમારા સહયોગી ટાઇમ્સ ઓફ ઇન્ડિયા સાથે વાત કરતા કહ્યું કે, ‘પ્રેસિડેન્ટ મોઈના નજીદીક હોવાના કારણે માને ઘણા બધા મહાન નેતાઓ સાથે મુલાકાતની તક મળી હતી. તાન્ઝાન્યા અને કોંગો સહિત અનેક આફ્રિકન દેશોના રાષ્ટ્રપ્રમુખોને મે કાઉન્સલ કર્યા છે.’ આફ્રિકામાં પોતાની જ્યોતિષ વિદ્યા છે પરંતુ મારા ભારતીય શાસ્ત્રો પ્રત્યેના અતૂટ વિશ્વાસ અને તેના આધારે સચોટ ભવિષ્યવાણીથી મોટાભાગના રાજકીય નેતાઓમાં મારી પ્રસિદ્ધી રહી છે. 

   રાવલ 1982માં કેન્યા આવ્યા હતા. જોકે ગુરુની ઉપાધી તો તેમને આ પહેલા જ ભુજ ખાતે સ્વામિનારાયણ મંદિરમાં સેવા કરતા મળી ગઈ હતી. આજે કેન્યામાં કોઈ એવું નહીં હોય જે તમને નરેન્દ્ર રાવલ(ગુરુ)ને નહીં ઓડખતું હોય. તેમની કંપની દેવકી ગ્રુપ ઓફ કંપનીઝમાં 5000 જેટલા લોકો કામ કરે છે. ફોર્બ્સની ધનવાન આફ્રિકનોની યાદીમાં રાવલનું નામ ઘણું આગળ છે. 

રાવલ કહે છે કે, ‘હું આને ભાગ્યથી વધુ કંઈ નહીં કહું. મે ક્યારેય લોકો પાસેથી હાથ જોવાના કે ભવિષ્ય ભાખવાના પૈસા લીધા નથી. 3 દશકા પહેલા મે કેન્યાની એક સ્ટીલ ફેક્ટરીમાં વર્કર તરીકે કામ શરું કર્યું હતું. તે સમયે મે અને મારી પત્ની નીતાએ ફક્ત પોતાની એક દુકાનનું સપનું જોયું હતું. જોકે અનેક સંઘર્ષ પછી આજે આ જગ્યાએ છું માટે થયું કે મારી જીવનકથા લોકોને કેવી જોઈએ.’