Gujarati News

સેચેલ્સ, તા.૧૩ : કોરોના સામેના જંગમાં વેક્સિનને સૌથી વધુ અસરકારક હથિયાર માનવામાં આવી રહ્યું છે. જોકે, કેટલાક નાના દેશોમાં મોટા ભાગના લોકોને વેક્સિન આપવામાં આવી હોવા છતાં ત્યાં કોરોનાના કેસની સંખ્યા વધી રહી છે. સેચેલ્સમાં મેરી નેઈગ એક કોલ સેન્ટરમાં કામ કરે છે અને તે વેક્સિન લેવા માટે આતુર હતી. આ ટચૂકડા દેશમાં મોટા ભાગના લોકોની જેમ માર્ચમાં તેને પણ ચીનની સિનોફાર્મ વેક્સિન આપવામાં આવી હતી. બાદમાં તેને લાગ્યું કે વેક્સિન લીધા બાદ હવે તેને કોરોના થઈ શકશે નહીં.

જોકે, થોડા સપ્તાહ બાદ તેનો કોરોના ટેસ્ટ પોઝિટિવ આવ્યો હતો. તેણે જણાવ્યું હતું કે, મને ઘણો મોટો આઘાત લાગ્યો હતો. કોરોના થયા બાદ તે હોમ આઈસોલેશનમાં હતી. તેને કોઈ પણ પ્રકારની ગંધ આવતી ન હતી અને સ્વાદ પણ આવતો ન હતો. આ ઉપરાંત તેના ગળામાં પણ થોડો સોજો આવી ગયો હતો. તેણે જણાવ્યું હતું કે વેક્સિન આપણને કોરોનાથી બચાવતી નથી પરંતુ તેના લક્ષણોથી બચાવે છે. મેં ઘણી બધી કાળજી રાખી હતી.

ચીન વેક્સિન ડિપ્લોમસી અંતર્ગત ઘણા દેશોને પોતાની વેક્સિન આપી રહી છે. મીડિયા અહેવાલ પ્રમાણે ચીને અન્ય દેશોને સિનોફાર્મના ૧૩.૩ બિલિયન ડોઝ આપ્યા છે. ચીનની કંપનીએ બે અલગ-અલગ વેક્સિન તૈયાર કરી છે પરંતુ કંપની સામે ઘણા પ્રશ્નો ઊભા થઈ રહ્યા છે. પ્રથમ તો અંતિમ સ્ટેજની ટ્રાયલના ડેટામાં પારદર્શકતા સામે સવાલો થયા છે. હવે સેચેલ્સમાં કે જ્યાં મોટા ભાગની વસ્તીને સિનોફાર્મ વેક્સિન આપવામાં આવી છે ત્યાં કેસની સંખ્યામાં મોટો ઉછાળો જોવા મળી રહ્યો છે. વિશ્વના ૫૬ દેશો કોરોનાનો સામનો કરવા માટે સિનોફાર્મ વેક્સિન આપી રહી છે. જોકે, સેચેલ્સના સમાચાર તેમના માટે મોટા આઘાત સમાન છે.

મહિનાઓ સુધી પબ્લિક હેલ્થ એક્સપર્ટ ધનિક અને ગરીબ દેશો વચ્ચે વેક્સિનની વહેંચણી પર ધ્યાન આપી રહ્યા હતા. હવે વૈજ્ઞાનિકો વિકાસશીલ દેશોને ચાઈનિઝ વેક્સિનને લઈને ચેતવણી આપી રહ્યા છે જેની અસરકારકતા ઘણી નબળી છે. તેઓ હવે આવા દેશોને ફાઈઝર-બાયોએનટેક અને મોડર્ના દ્વારા વિકસાવવામાં આવેલી વેક્સિન લેવાનું કહી રહ્યા છે.

ઓસ્ટ્રેલિયાના સિડનીની કિમ્બર્લી ઈન્સ્ટિટ્યુટ ઓફ ધ યુનિવર્સિટી ઓફ ન્યૂ સાઉથ વેલ્સ ખાતે બાયોસિક્યુરિટી પ્રોગ્રામના વડા રેઈના મેકઈન્ટાયરેએ જણાવ્યું હતું કે, આર્થિક લાભ માટે તમારે ઉચ્ચ ગુણવત્તા અને અસરકારકતા ધરાવતી વેક્સિનનો ઉપયોગ કરવો જોઈએ, નહીં તો આ રોગ લાંબો સમય સુધી રહેશે અને લાંબા સમય સુધી તમારે તેની સામે લડવાનું રહેશે.

સેચેલ્સમાં તેની ૬૦ ટકાથી વુધ વસ્તીને સિનોફાર્મ વેક્સિન આપવામાં આવી છે. આ ટચૂકડો દેશ હિંદ મહાસાગરમાં માડાગાસ્કરની નોર્થઈસ્ટમાં આવેલો છે જેની વસ્તી ૧,૦૦,૦૦૦થી થોડી વધુ છે. જોકે, હાલમાં ત્યાં કોરોનાના કેસની સંખ્યા વધી છે અને ત્યાં ફરીથી લોકડાઉન લગાવવામાં આવ્યું છે.

જેટલા લોકોને વેક્સિન આપવામાં આવી છે તેમાંથી ૫૭ ટકા લોકોને સિનોફાર્મ વેક્સિનના બે ડોઝ આપવામાં આવ્યા છે જ્યારે ૪૩ ટકાને એસ્ટ્રાઝેનેકા વેક્સિન આપવામાં આવી છે. સ્વાસ્થ્ય મંત્રાલયના ડેટા પ્રમાણે હાલમાં જેટલા એક્ટિવ કેસ છે તેમાંથી ૩૭ ટકા કેસ રસી લીધેલા લોકોના છે. જોકે, મંત્રાલયે તે નથી જણાવ્યું કે આ ૩૭ ટકા લોકોમાંથી કેટલાને સિનોફાર્મ વેક્સિન આપવામાં આવી છે.

જોકે, વૈજ્ઞાનિકોનું કહેવું છે કે કોઈ પણ વેક્સિન ૧૦૦ ટકા અસરકારક નથી. જોકે, સેચેલ્સથી વિરુદ્ધ ઈઝરાયલ છે જે વિશ્વમાં વેક્સિન આપનારો બીજો સૌથી મોટો દેશ છે. ઈઝરાયલે કોરોનાને હરાવવામાં સફળતા મેળવી છે. ઈઝરાયલમાં ફાઈઝરની વેક્સિન આપવામાં આવી છે. સ્ટડીમાં જોવા મળ્યું છે કે ફાઈઝરની વેક્સિન ટ્રાન્સમિશન રોકવા માટે ૯૪ ટકા અસરકારક છે.