Gujarati News

હાલ લોકડાઉનમાં બ્લાઇન્ડ ક્રિકેટમાં દેશનું અને વલસાડ જિલ્લાનું નામ રોશન કરનારા ૧૫ થી વધુ ખેલાડીઓ ભારે વિષમ પરિસ્થિતિ વચ્ચે જીવન વ્યતીત કરી રહ્યા છે છતાં જિલ્લા તંત્ર ખેલાડીઓના મત વિસ્તારોના ધારાસભ્યો, સાંસદ કે પછી સંસ્થાઓ એ પણ તેમને મદદ કરવા આગળ આવ્યા નથી. ગત વર્ષે ગુંદલાવના સરપંચ નિતિન પટેલ અને તેમની ટીમ દ્વારા કપરાડા પહોંચી મદદ કરી હતી.હાલ લોકડાઉન ના પગલે ફરીવાર તેમની પરિસ્થિતિ કફોડી બની છે ત્યારે જિલ્લાના વડા અધિકારીઓ એ પણ જિલ્લાનું નામ ઉજળું કરનારા ખેલાડીઓને મદદ કરવી જોઈએ.તો બીજી તરફ બ્લાઇન્ડ ક્રિકેટરોના ક્રિકેટ એસોસિએશન ફોર ધ બ્લાઇન્ડ, ગુજરાત નાનાપોઢાના કોચ કમ મેનેજર દિલીપ જોગારી એ એક વીડિયો સદેશમાં  જણાવ્યું કે સરકારમાં સંખ્યાબંધ રજુઆત બાદ પણ કોઈપણ ક્રિકેટરને સરકારી નોકરી મળી નથી. હાલ લોકડાઉનમાં પણ સરકારી વિભાગ કે રાજકીય પક્ષએ મદદ નથી કરી. ગત વર્ષે ગુંદલાવ સરપંચ અને તેમના મિત્રોએ તમામ ક્રિકેટરોને મદદ કરી હતી. જિલ્લાના કોઈપણ બ્લાઇન્ડ ક્રિકેટરની કાયમી આવક નથી, જેથી તેમની પરિસ્થિતિ વિકટ બની છે, ત્યારે સરકાર, જિલ્લા કલેકટર સહિત વિભાગો અને સંસ્થાઓ દ્વારા ક્રિકેટરોને મદદ અપાઈ તેવી માગણી કરી છે. તો બ્લાઇન્ડ ક્રિકેટ વર્લ્ડકપમાં ચાર વર્લ્ડકપમાં ભારતનું પ્રતિનિધિત્વ કરનારા અને બેસ્ટ પ્લેયર ઓફ ધ વર્લ્ડનું બિરુદ મેળવનાર વલસાડ જિલ્લાના ક્રિકેટર કેતન પટેલે જણાવ્યું કે અનેક વિષમ પરિસ્થિતિઓ વચ્ચે પ્રેકિટસ કરી ટીમમાં સ્થાન મેળવી દેશનું જિલ્લાનું નામ આગળ કર્યું છતાં ન તો અમને નોકરી મળી ન તો લોકડાઉનમાં કોઈ મદદ મળી. જિલ્લાના બ્લાઇન્ડ ક્રિકેટરો અન્યને ત્યાં મજુરી કરી, ખેતરમાં કામ કરી કે દૂધ વેચી જીવન વ્યતીત કરી ભારે વિષમ પરિસ્થિતિમાં જીવન વ્યતીત કરી રહ્યા છે, નોકરી, અને પૂર્ણ સમયની રોજગારીના અભાવે હાલ લોકડાઉનમાં તેઓ ગંભીર પરિસ્થિતિમાંથી પસાર થઈ રહ્યા છે. (કાર્તિક બાવીશી દ્વારા)