Gujarati News

નવી દિલ્હી: રોડ ટ્રાન્સપોર્ટ અને હાઈવે મંત્રાલય તેના મહત્ત્વાકાંક્ષી હાઈવે કન્સ્ટ્રક્શન પ્રોગ્રામને ધિરાણ પૂરું પાડવા માટે આગામી નાણાકીય વર્ષ દરમિયાન ઓફ-બજેટરી મિકેનિઝમ મારફત આશરે રૂપિયા એક લાખ કરોડ એકત્ર કરશે.

આ રકમ નેશનલ હાઈવે ઓથોરિટી ઓફ ઇન્ડિયા બોન્ડ મારફત તથા લાઇફ ઇન્શ્યોરન્સ કોર્પોરેશન ઓફ ઇન્ડિયા, એમ્પ્લોયી પ્રોવિડન્ટ ફંડ ઓર્ગેનાઇઝેશન દ્વારા સંસ્થાકીય ધિરાણ મારફત તથા અન્ય માર્કેટ બોરોવિંગ મારફત એકત્ર કરવામાં આવશે.

મંત્રાલય ટોલ ઓપરેટ ટ્રાન્સફર સ્કીમ હેઠળ હાઈવે મોનેટાઇઝેશન પ્રોગ્રામ મારફત પણ નાણાં ઊભાં કરશે તથા NHAIના આગામી ઇન્ફ્રાસ્ટ્રક્ચર ઇન્વેસ્ટમેન્ટ ફંડ મારફત પણ નાણાં ઊભાં કરશે. NHAIના ચેરમેન દીપક કુમારે ઇટીને જણાવ્યું હતું કે, અમે આગામી નાણાકીય વર્ષ દરમિયાન બજારમાંથી આશરે ₹એક લાખ કરોડ એકત્ર કરીશું. તેમાંથી આશરે 70 ટકા ભંડોળ બોન્ડ્ઝ તથા અન્ય બોરોઇંગ મારફત આવશે તથા બાકીનું ભંડોળ હાઈવે મોનેટાઇઝેશન પ્રોગ્રામ મારફત આવશે.

NHAI દ્વારા ચાલુ નાણાકીય વર્ષ દરમિયાન જે રકમ એકત્ર કરવામાં આવી છે તેની સરખામણીએ આ રકમ લગભગ બમણી છે. ચાલુ નાણાકીય વર્ષમાં ઓથોરિટીએ ₹47,000 કરોડ એકત્ર કર્યા છે.

NHAI InvITs માટેની દરખાસ્ત પર આગામી 15 માર્ચે હાઈવે ઓથોરિટીના બોર્ડમાં વિચારણા કરવામાં આવી શકે. નાણાપ્રધાન દ્વારા બજેટ પ્રવચનમાં NHAI InvITs માટેની જાહેરાત કરવામાં આવી હતી. કુમારે જણાવ્યું હતું કે, અમે એકવાર મજબૂત યોજના તૈયાર કરીએ ત્યાર બાદ તરત બોર્ડની સૈદ્ધાંતિક મંજૂરીની માંગણી કરીશું.