Gujarati News

ભોપાલ,તા.૧૩:મધ્યપ્રદેશના ભોપાલમાં રહેતા એક પરિવારના ત્યાં દીકરીનો જન્મ થતાં ખુશીનો માહોલ જોવા મળી રહ્યો છે. ઘરે દીકરીનો જન્મ થતાં ખુશ આ પરિવારના સભ્યોએ તેમના વિસ્તારમાં પકોડીનો સ્ટોલ લગાવીને આસપાસના તમામ લોકોને ફ્રીમાં ભરપેટ પકોડીઓ ખવડાવી છે. સાથે-સાથે ત્યાંથી પસાર થતાં લોકોને પકોડીઓ ખાવા માટે પણ આમંત્રિત કરી રહ્યા છે. સોશિયલ મીડિયા પર લોકોને પકોડીઓ ખવડાવતો વિડીયો પણ વાયરલ થયો છે. ઘરે દીકરીનો જન્મ થતાં વિસ્તારમાં ફ્રી પકોડીનો સ્ટોલ ઊભો કર્યો છે કે જયાં આવીને લોકો મફતમાં જોઈએ એટલી પકોડીઓ ખાઈ શકે છે.

ઘરે દીકરીનો જન્મ થયો હોવાની ખુશીમાં આ પરિવારે પોતાના વિસ્તારમાં પકોડીઓના કાઉન્ટર લગાવ્યા છે અને ફ્રીમાં પકોડીઓ ખાવા માટે લોકોની લાંબી લાઈન જોવા મળી રહી છે. અંચલ ગુપ્તા નામના આ વ્યકિત ત્યાંથી પસાર થતાં લોકોને ફ્રીમાં પકોડીઓ ખાવા માટે આમંત્રિત કરી રહ્યા છે. ગુપ્તાજી દીકરીના જન્મની ખુશીમાં લોકોને ભરપેટ પકોડીઓ ખવડાવી રહ્યા છે.

મધ્યપ્રદેશના ભોપાલના રહેવાસી એવા અંચલ ગુપ્તાએ કહ્યું કે મારા ઘરે દીકરીનો જન્મ થયો છે. મારે દીકરી જ જોઈતી હતી. દીકરીના જન્મ પહેલા જ મેં એવું નક્કી કર્યું હતું કે જો મારા ઘરે દીકરીનો જન્મ થશે તો એક આખો દિવસ લોકોને ફ્રીમાં પકોડીઓ ખવડાવીશું. હવે ઘરે દીકરીનો જન્મ થતાં અમારા વિસ્તારમાં ફ્રી પકોડીનો સ્ટોલ ઊભો કર્યો છે કે જયાં આવીને લોકો મફતમાં જોઈએ એટલી પકોડીઓ ખાઈ શકે છે.

ત્યારે હવે ફ્રીમાં પકોડી ખવડાવતો વિડીયો પણ સોશિયલ મીડિયામાં વાયરલ થઈ રહ્યો છે. વાયરલ વિડીયોના આધારે મધ્યપ્રદેશના કેટલાંક લોકો અંચલ ગુપ્તાની દીકરીને 'બેટી બચાવો, બેટી પઢાઓ' અભિયાનની બ્રાન્ડ એમ્બેસેડર બનાવવાની માગ કરી રહ્યા છે. આ વિડીયોમાં કેટલાંક લોકો મધ્યપ્રદેશના મુખ્યમંત્રી શિવરાજસિંહ ચૌહાણને પણ ટેગ કરી રહ્યા છે.