Gujarati News

નવીદિલ્હી, તા.૧૩: વડાપ્રધાન નરેન્દ્ર મોદીનો જાદુ અમેરિકા પર પણ ચાલ્યો. આ મહિને ભારતની મુલાકાતે આવી રહેલા અમેરિકાના વિદેશ મંત્રી માઇક પોમ્પિયો એ બંને દેશો વચ્ચે વધુ સારા સંબંધની આશા વ્યકત કરતાં કહ્યું કે મોદી હૈ તો મુમકિન હૈ. થોડાંક સપ્તાબ પહેલાં ૬૦૦ મિલિયન ભારતીયોએ મોદીને વિશાળ જનાદેશ આપ્યો હતો. ૧૯૭૧ બાદથી પણ કોઇપણ ભારતીય પીએમ બહુમતીની સાથે ફરીથી પીએમઓમાં પાછા આવ્યા નથી, પરંતુ મોદીએ ' શાનદાર'જીત પ્રાપ્ત કરી.

માઇક પોમ્પિયોએ કહ્યું કે વડાપ્રધાન નરેન્દ્ર મોદીએ પોતાના ચૂંટણી કેમ્પનિંગમાં કહ્યું હતું – મોદી હૈ તો મુમકિન હૈ અને તેણે સાચું કરી દેખાડ્યું. હવે ભારત અને અમેરિકાની વચ્ચે સંભાવનાઓના વિસ્તારની તરફ અમે જોઇ રહ્યા છીએ. માઇક પોમ્પિયો એ આ વાત બુધવારના રોજ યુએસ-ઇન્ડિયા બિઝનેસ કાઉન્સિલ સમિટમાં કહી.

અમેરિકન વિદેશ મંત્રી પોમ્પિયોની આ મહિને ભારત યાત્રા પ્રસ્તાવિત છે. આ દરમ્યાન વડાપ્રધાન નરેન્દ્ર મોદી અને ભારતીય સમકક્ષ એસ.જયશંકર સાથે મુલાકાત થવાની છે. પોમ્પિયોનું માનવું છે કે આ દરમ્યાન બંને દેશોની વચ્ચે મોટા મુદ્દા અને વિચારો પર ચર્ચા થશે. આથી દ્વિપક્ષી સંબંધોને નવો આયામ મળશે.