Gujarati News

આજે વર્ષના સૌથી મોંઘા લગ્ન થવાના છે. અજય અને સ્વાતી પીરામલના દીકરા આનંદે સપ્ટેમ્બર મહિનામાં ઈશા અંબાણી સાથે સગાઈ કર્યા બાદ લોકોએ ગૂગલ પર તેને વારંવાર સર્ચ કર્યો છે. સ્પોટલાઈટથી દૂર રહેલા આનંદનું રિઝ્યૂમ પ્રભાવી છે. Pennsylvania યુનિવર્સિટીમાં ઈકોનોમિક્સમાં ગ્રેજ્યુએશન અને હાવર્ડ યુનિવર્સિટીમાંથી માસ્ટર ડિગ્રી લઈને 2011માં ભારત પરત આવ્યો.

આનંદે હેલ્થકેર સ્ટાર્ટઅપ શરૂ કર્યું

ભારત આવીને આનંદે ગ્રામ્ય હેલ્થકેર સ્ટાર્ટઅપ પીરામલ ઈ-સ્વાસ્થ્ય શરૂ કર્યું, જે બાદમાં ફેમિલી બિઝનેસમાં જોડવામાં આવ્યું. હાલ પીરામલ સ્વાસ્થ્યમાં પ્રતિ દિવસ 40,000 દર્દીઓની સારવાર કરવામાં આવે છે. 4500 કર્મચારીઓ ધરાવતું આ હેલ્થકેર સ્ટાર્ટ અપ હાવર્ડ બિઝનેસ સ્કૂલનો કેસ સ્ટડી બન્યો છે. આનંદ આ હેલ્થકેરને ‘સોશિયલ એન્ટરપ્રાઈઝ માને છે નહીં કે ફેમિલી બિઝનેસ ગ્રુપની કમાણીનું સાધન.’

કરિયર અંગે હતી મૂંઝવણ

આનંદ માત્ર હેલ્થકેર નહીં રીયલ એસ્ટેટ માર્કેટમાં કાઠું કાઢી ચૂક્યો છે. 2012માં આનંદે 434 મિલિયન ડોલરની ડીલ ‘Goldman Sachs and Warburg Pincus’ સાથે કરી હતી. જે ઈન્ડિયાના રિયલ એસ્ટેટ માર્કેટમાં થયેલું સૌથી મોટું પ્રાઈવેટ ઈક્વિટી રોકાણ છે. જો કે 20-25 વર્ષની ઉંમરે પીરામલ ગ્રુપના એક્ઝિક્યુટીવ ડિરેક્ટર આનંદ પણ કરિયર અંગે મૂંઝવણમાં હતા.

મુકેશ અંબાણીએ આપી સલાહ

એ વખતે 25 વર્ષના આનંદને કરિયરની સલાહ આપવા એશિયાના સૌથી ધનિક બિઝનેસમેન અને ફેમિલી ફ્રેંડ મુકેશ અંબાણી આવ્યા. આનંદ પીરમલને કન્સલ્ટિંગ અને બેંકિંગ વચ્ચે પસંદગી કરવાની હતી. ત્યારે RILના ચેરમેન મુકેશ અંબાણીએ કહ્યું, “કન્સલ્ટન્ટ બનવું એ મેચ જોવી કે ક્રિકેટ અંગે કમેન્ટ્રી કરવા જેવું છે. જ્યારે બિઝનેસમેન બનવું ક્રિકેટ રમવા સમાન છે. કમેન્ટ્રી કરીને ક્રિકેટ કેવી રીતે રમાય તે જાણી નથી શકાતું. જો તારે કંઈક કરવું હોય, લાંબા ગાળે બિઝનેસમેન બનવું હોય તો અત્યારે જ શરૂ કર.”

લગ્ન બાદ સી-ફેસિંગ બંગલોમાં રહેશે ‘ઈશાનંદ’

હવે 8 વર્ષ બાદ આનંદ મુકેશ અંબાણીની દીકરી ઈશા સાથે આજે લગ્ન કરવા જઈ રહ્યો છે. મહાબળેશ્વરમાં ઈશાને પ્રપોઝ કર્યા બાદ આજે બંને પ્રભુતામાં પગલા પાડશે. અંબાણી પરિવારના ઘર એન્ટીલિયામાં ભારતીય પરંપરા પ્રમાણે બંનેના લગ્ન થશે. લગ્ન બાદ આ કપલ 50,000 સ્ક્વેર ફૂટના સી-ફેસિંગ બંગલોમાં રહેવા જશે. આ બંગલો સ્વાતી અને અજય પીરમલ તરફથી લગ્નની ભેટ છે. 6 વર્ષ પહેલા હિંદુસ્તાન યુનિલિવર પાસેથી 452.5 કરોડમાં ખરીદ્યો હતો.