Gujarati News

ક્વેટા : ટી - ટ્વેન્ટી વર્લ્ડ કપની સેમીફાઈનલમાં હાર બાદ જ્યારે પાકિસ્તાની ક્રિકેટ ટીમ પર પસ્તાળ પડી છે, ત્યારે  પાકિસ્તાનના ચોથા પ્રાંત બલૂચિસ્તાનના લોકો રસ્તા પર આવી ગયા હતા અને પાકિસ્તાનની હારની જોરશોરથી ઉજવણી કરી હતી.  ઈન્ટરનેટ મીડિયા પર આવા ઘણા વીડિયો વાયરલ થઈ રહ્યા છે જેમાં બલૂચ યુવાનો રસ્તાઓ પર આવીને ઓસ્ટ્રેલિયાની જીતની ઉજવણી કરતા જોઈ શકાય છે. અફઘાન પત્રકાર હબીબ ખાને પણ આવા ઘણા વીડિયો શેર કર્યા છે.

તેણે આવો જ એક વીડિયો શેર કર્યો જેમાં ડઝનબંધ બલૂચ યુવાનો અને બાળકો, કિશોરોટથી ભરેલા રૂમમાં પાકિસ્તાનની હારની મજાક ઉડાવી રહ્યા છે અને ઓસ્ટ્રેલિયાની જીતની ખુશીમાં એકસાથે કૂદી પડ્યા છે.  

ગુરુવારે દુબઈમાં રમાયેલી સેમિફાઈનલ મેચમાં પાકિસ્તાન ઓસ્ટ્રેલિયા સામે પાંચ વિકેટે ખરાબ રીતે હારી ગયું હતું.  આ પછી, પાકિસ્તાની ક્રિકેટ ટીમની આ હારની ઉજવણી કરવા માટે, બલોચ લોકોની ભીડ રસ્તા પર આવી ગઈ.  અન્ય એક વીડિયોમાં ખુશખુશાલ લોકો પાકિસ્તાનની હારની ઉજવણી કરવા માટે રસ્તાઓ પર સરઘસ કાઢતા જોવા મળ્યા હતા.

આ દરમિયાન અફઘાનિસ્તાનના ઘણા ભાગોમાં લોકો પાકિસ્તાનની હારની ઉજવણી કરતા જોવા મળ્યા હતા.  અફઘાનિસ્તાનના જલાલાબાદમાં ઘણા લોકોએ આનંદ સાથે ફટાકડા ફોડી, જ્યારે ખોસ્તમાં લોકોએ રસ્તાઓ પર નાચ-ગાન કરીને પોતાની ખુશી વ્યક્ત કરી.  ઉલ્લેખનીય છે કે આતંકવાદના પ્રાયોજક પાકિસ્તાને દાયકાઓથી બલૂચિસ્તાનમાં અત્યાચાર ચાલુ રાખ્યા છે અને ત્યાંના લોકો લાંબા સમયથી પાકિસ્તાનથી આઝાદી ઈચ્છે છે.  પાકિસ્તાની સેનાની કાર્યવાહીને કારણે અહીંના લોકોમાં અચાનક મોટી સંખ્યામાં બલૂચ ગાયબ થઈ જવાના કારણે પાકિસ્તાન સરકારથી લોકોમાં ભારે નારાજગી છે.

નોંધનીય છે કે સંસાધનથી સમૃદ્ધ બલૂચિસ્તાન પાકિસ્તાનનો સૌથી ઓછો વિકસિત પ્રાંત છે.  તેથી જ છેલ્લા કેટલાય દાયકાઓથી આઝાદીની જ્વાળાઓ ભભૂકી રહી છે.  બલૂચ લોકો પાકિસ્તાનથી આઝાદી ઈચ્છે છે અને તેઓ કહે છે કે પાકિસ્તાને તેમના પર બળજબરીથી કબજો જમાવ્યો છે.  બલૂચો માને છે કે તેમનો વિસ્તાર ૧૯૪૭ પહેલા સ્વતંત્ર હતો.