Gujarati News

બેંગલુરુઃ કર્ણાટકમાં 224માંથી 222 વિધાનસભા બેઠકો પર શનિવારે મતદાન થયું છે, જેનું પરિણામ 15 મેએ જાહેર થશે. આ વખતે કર્ણાટકમાં ભાજપ, કોંગ્રેસ અને જેડીએસ વચ્ચે ટક્કર છે. જોકે અલગ અલગ એક્ઝિટ પોલમાં ત્રિશંકુ વિધાનસભા સર્જાશે તેવું અનુમાન વ્યક્ત કરવામાં આવ્યું છે. અંતિમ પરિણામ જો એક્ઝિટ પોલ્સ મુજબ આવશે તો કહી શકાય કે, જેડીએસ કિંગમેકરની ભૂમિકા ભજવી શકે છે. કર્ણાટકમાં બહુમતનો આંકડો મેળવવા માટેકોઈ પણ પક્ષે 113 બેઠકો પર જીત સુનિશ્ચિત કરવી પડશે. અહીં દેશના ચાર મોટા એક્ઝિટ પોલ્સ કર્ણાટકની કેવી તસવીર રજૂ કરી રહ્યા છે તે જાણીએ : 

ટાઇમ્સ નાઉ-વીએમઆર
ચેનલ ‘ટાઇમ્સ નાઉ’એ કર્ણાટક ચૂંટણી માટે બે એક્ઝિટ પોલ કર્યા છે. ટાઇમ્સ નાઉ અને વીએમઆરના એક્ઝિટ પોલમાં કોંગ્રેસ સૌથી મોટી પાર્ટી બનીને સામે આવી રહી છે. જોકે આ એક્ઝિટ પોલમાં ત્રિશંકુ વિધાનસભાની તસવીર દેખાઈ રહી છે આ એક્ઝિટ પોલમાં કોંગ્રેસને 97, ભાજપને 87, જેડીએસ પ્લસ 35 અને અન્યને 3 બેઠકો મળવાનું અનુમાન વ્યક્ત કરાયું છે. આ રીતે જેડીએસ કર્ણાટકમાં કિંગમેકર તરીકે ઊભરી શકે છે.

ઇન્ડિયા ટુડે-એક્સિસ
ઇન્ડિયા ટુડે-એક્સિસનો એક્ઝિટ પોલ કોંગ્રેસ માટે ખુશખબરી લઈને આવ્યો છે. આ એક્ઝિટ પોલ મુજબ, કર્ણાટકમાં સિદ્ધારમૈયા સરકાર કમબેક કરી શકે છે. આ એક્ઝિટ પોલમાં કોંગ્રેસને 106થી 118, ભાજપને 79થી 82, જેડીએસને 22થી 30 અને અન્યને 1થી 4 બેઠકો મળવાનું અનુમાન છે.

ન્યૂઝ એક્સ- સીએનએક્સ એક્ઝિટ પોલ
ન્યૂઝ એક્સ-સીએનએક્સના એક્ઝિટ પોલમાં ભાજપ કોંગ્રેસ પર સરસાઈ મેળવતો દેખાઈ રહ્યો છે. જોકે આ એક્ઝિટ પોલમાં હંગ એસેમ્બલી બનતી દેખાઈ રહી છે, કારણ કે ભાજપ બહુમતથી થોડો દૂર રહેવાના આસાર છે. આ એક્ઝિટ પોલ મુજબ, કોંગ્રેસને 72થી 78, ભાજપને 102થી 110, જેડીએસને 35થી 39 અને અન્યને 3થી 5 બેઠકો મળવાનું અનુમાન વ્યક્ત કરવામાં આવ્યું છે. આ હિસાબે જેડીએસ કિંગમેકર બની શકે છે.

એબીપી-સી વોટર
એબીપી ન્યૂઝે સી-વોટર સાથે મળીને એક્ઝિટ પોલ કર્યો છે. જોકે આ એક્ઝિટ પોલમાં બપોરે 2 વાગ્યા સુધીના વોટિંગના આંકડા આપવામાં આવ્યા છે. તે મુજબ ભાજપ સૌથી મોટી પાર્ટી તરીકે ઊભરે તેવી આશા વ્યક્ત કરાઈ છે. આ એક્ઝિટ પોલ મુજબ, કોંગ્રેસને 89થી 99, ભાજપને 97થી 109, જેડીએસને 21થી 30 અને અન્યને 3થી 5 બેઠકોનું અનુમાન છે.