Gujarati News

નવી દિલ્હી, તા. ૧૧ :. ફોર્બ્સ ઈન્ડીયાએ આજે ભારતમાં સૌથી શ્રીમંત લોકોની નવી યાદી બહાર પાડી છે. ફોર્બ્સે ભારતના ટોચના ૧૦૦ સૌથી ધનવાન લોકોની જે યાદી બહાર પાડી છે તેમા ફરી એક વખત રીલાયન્સ ઈન્ડસ્ટ્રીઝના માલિક મુકેશ અંબાણી ટોપ ઉપર છે. તેઓ સતત ૧૨મી વખત ટોપ ઉપર રહ્યા છે. લગભગ ૨૮.૪ કરોડ (૪ મીલીયન અમેરીકી ડોલર)ના વધારા સાથે મુકેશ અંબાણી લગભગ ૩.૬૪ લાખ કરોડ રૂ. (૫૧.૪ બીલીયન)ની કુલ સંપત્તિ સાથે પ્રથમ ક્રમાંકે છે તો ગૌતમ અદાણીએ ૮ પોઈન્ટની છલાંગ લગાવી છે અને તેઓ યાદીમાં બીજા ક્રમે પહોંચી ગયા છે. આ સિવાય ઉદય કોટકે પહેલીવાર ટોપ ૫ માં સ્થાન મેળવ્યુ છે. સ્ટીલ બનાવતી કંપની આર્સેલરના માલિક લક્ષ્મી મિત્તલ આ યાદીમાં ઘણા નીચે ચાલ્યા ગયા છે. ત્રીજા ક્રમે રહેતા મિત્તલ ૬ પોઈન્ટ ગબડીને ૯મા ક્રમે આવી ગયા છે. સ્ટીલની માંગ અને ભાવ ઘટવાથી આવુ થયુ છે. આ સાથે ટોપ ટેનમાં અઝીમ પ્રેમજી પણ નથી.