News of Saturday, 11th July 2020
જયપુર, તા. ૧૧ : રાજસ્થાનની કોંગ્રેસ સરકારને ઉથલાવી દેવાના ષડયંત્રના ઘટસ્ફોટ થયા બાદ અને એસઓજી વતી કેસ નોંધવામાં આવ્યા પછી મુખ્યમંત્રી અશોક ગેહલોતે ભાજપ પર આકરા આરોપ લગાવ્યા છે. તેમણે ભાજપ પર હોર્સ ટ્રેડિંગ અને તેમની સરકારને ઉથલાવવાનો પ્રયાસ કરવાનો આરોપ લગાવ્યો. શનિવારે ગેહલોતે એક પ્રેસ કોન્ફરન્સમાં દાવો કર્યો હતો કે ભાજપ તેમની સરકાર ગબડાવવા માટે કાવતરું ઘડી રહી છે. તેમણે સીધો આરોપ લગાવ્યો કે ૨૫-૨૫ કરોડ રૂપિયા ધારાસભ્યોને આપવામાં આવે છે. ગેહલોતે કહ્યું કે સતીશ પૂનીયા હોય કે રાજેન્દ્ર રાઠોડ, તેઓ કેન્દ્રીય નેતૃત્વના ઇશારે અમારી સરકારને ગબડાવવા માટે રમત રમી રહ્યા છે. મુખ્યમંત્રીએ દાવો કર્યો હતો કે ધારાસભ્યોને ૧૦-૧૦ કરોડ રૂપિયા અગાઉથી અને સરકાર પડ્યા બાદ ૧૫ કરોડ રૂપિયા આપવાની લાલચ આપવામાં આવી રહી છે.
કોંગ્રેસમાં હોર્સ ટ્રેડિંગ અને જૂથવાદ પાછફ્ર ડેપ્યુટીઓ સીએમ સચિન પાયલોટ દ્વારા કાવતરું કરવાના પ્રશ્નના મુદ્દે મુખ્ય પ્રધાન ગેહલોતે કહ્યું હતું કે 'કોણ મુખ્યમંત્રી બનવા નથી માંગતું? અમારી બાજુથી, ૫-૭ ઉમેદવારો મુખ્યમંત્રી બનવા માટે પાત્ર હશે, પરંતુ માત્ર એક જ મુખ્યમંત્રી બની શકે છે. જ્યારે કોઈ એક મુખ્યમંત્રી બને છે, ત્યારે અન્ય શાંત થઈ જાય છે. જો કે, બાદમાં તેમણે જણાવ્યું હતું કે આ મામલો બિલકુલ નથી. રાજસ્થાન પોલીસ સ્પેશિયલ ટાસ્ક ફોર્સ (એસઓજી) એ મુખ્ય પ્રધાન અશોક ગેહલોત, નાયબ મુખ્ય પ્રધાન સચિન પાયલોટ અને સરકારના ચીફ વ્હીપ મહેશ જોશીને ધારાસભ્યોને લાલચ આપીને રાજ્યની ચૂંટાયેલી કોંગ્રેસ સરકારને અસ્થિર બનાવવાના પ્રયાસના આરોપો પર નિવેદનો આપવા બોલાવ્યા છે.
એસઓજીએ શુક્રવારે રાજ્યમાં ધારાસભ્યોના હોર્સ ટ્રેડિંગ અને બે મોબાઇલ નંબરના મોનિટરિંગ દ્વારા બહાર આવેલા તથ્યોના આધારે ચૂંટાયેલી સરકારને અસ્થિર બનાવવાના આરોપસર કેસ નોંધ્યો હતો. એસઓજી અધિકારીઓના જણાવ્યા મુજબ, આ સંખ્યા પર થયેલી વાતચીતથી એવું જણાય છે કે શાસક પક્ષના ધારાસભ્યોને રાજ્ય સરકાર ગબડાવવા માટે લાલચ આપવામાં આવી રહી છે. ૧૯ જૂને રાજ્યમાંથી રાજ્યસભાની ત્રણ બેઠકો માટેની ચૂંટણી પહેલા, સત્તાધારી કોંગ્રેસે કેટલાક ધારાસભ્યો પર લાલચ આપવાનો આરોપ લગાવ્યો હતો. પાર્ટી દ્વારા વિશેષ ટાસ્ક ફોર્સ (એસઓજી) ને ફરિયાદ કરવામાં આવી હતી.
મુખ્ય પ્રધાન અશોક ગેહલોતે કહ્યું હતું કે રાજ્યના ધારાસભ્યોની લાલચ આપવામાં આવી રહી છે અને કરોડો રૂપિયાની રોકડ જયપુર સ્થાનાંતરિત થઈ રહી છે. રાજ્ય વિધાનસભાના કુલ ૨૦૦ ધારાસભ્યોમાં કોંગ્રેસના ૧૦૭ ધારાસભ્યો છે અને ભાજપ પાસે ૭૨ ધારાસભ્યો છે. કોંગ્રેસને રાજ્યના ૧૩ માંથી ૧૨ અપક્ષ ધારાસભ્યોનું સમર્થન પણ છે.