Gujarati News

નવી દિલ્હી તા. ૧૧ : પોતાના ફેવરિટ સ્ટારને મળવા માટે લોકો મુંબઈ આવતા હોય છે તેવુ તો તમે સાંભળ્યુ જ હશે. ફેન્સ ભલે પોતાના ફેવરિટ સ્ટાર્સને મળી ન શકે, પરંતુ તેમની એક ઝલક મેળવીને જ ખુશ થઈ જાય છે. તાજેતરમાં જ કોમેડી શો તારક મેહતા કા ઉલ્ટા ચશ્માના જેઠાલલને મળવા બે બાળકોએ પણ આવો જ એક પ્લાન બનાવ્યો.

સ્પોટબોયના રિપોર્ટ અનુસાર, ૧૪ અને ૧૩ વર્ષની ઉંમરના બે બાળકો પોતાના ઘરે કોઈને જણાવ્યા વિના જ રાજસ્થાનથી મુંબઈ રવાના થઈ ગયા. આ બાળકો બસથી મુંબઈ પહોંચ્યા અને ત્યાં જઈને પવઈ વિસ્તારમાં આસપાસના લોકો જેઠાલાલના ઘરનું સરનામુ પુછવા લાગ્યા.

એક વ્યકિતએ બન્ને બાળકોની બોડી લેંગ્વેજ જોયા પછી પોલીસને આ વાતની જાણ કરી. પોલીસે ઘટનાસ્થળ પર પહોંચીને પૂછપરછ કરી તો આખી વાત સામે આવી.

આઠમા અને છઠ્ઠા ધોરણમાં ભણતા આ બાળકોએ પોલીસને જણાવ્યું કે તે તારક મેહતા કા ઉલ્ટા ચશ્માના જેઠાલાલ એટલે કે દિલીપ જોશીના ફેન છે. જેઠાલાલને મળવા તે પરિવારના લોકોને જણાવ્યા વિના મુંબઈ આવી ગયા. અત્યારે બાળકો પોલીસ પાસે છે અને તેમના પરિવારનો સંપર્ક કરવાનો પ્રયત્ન કરી રહ્યા છે.(૨૧.૨૮)