Gujarati News

મુંબઈ, તા. ૧૦ : એન્ટી નાર્કોટિક્સ સેલની આઝાદ મેદાન પોલીસ યુનિટ દ્વારા શુક્રવારે પેઠુનીમાં રેડ કરવામાં આવી હતી. ત્યાંથી ૧૫ લાખની કિંમતનું ૧૫૦ ગ્રામ એમડી ડ્રગ્સ કબજે કરવામાં આવ્યું હતું. ડીસીપી દત્તા નલાવડેની ટીમે ત્યાંથી અયાઝ નામના આરોપીની ધરપકડ કરી છે. સીનિયર ઇન્સ્પેક્ટર દત્તાત્રા મસવેકર અને સચિન કદમની ટીમ છેલ્લા ઘણા દિવસોથી તેની પર નજર રાખી રહી હતી.

એક અધિકારીના જણાવ્યા મુજબ, અયાઝ કેટલાક પોલીસ ઇન્સ્પેક્ટરના બાતમીદાર પણ હતો અને ખબર આપવાની આડમાં આ ડ્રગ્સ રેકેટ ચલાવતો હતો. ગત મહિને, દક્ષિણ મુંબઈમાં મોડી રાતની એક કાર અટકાવતા પોલીસનો એક વીડિયો વાયરલ થયો હતો. સૂત્રોના જણાવ્યા મુજબ વિડીયોમાં જે પુરુષ જોવા મળી રહ્યો છે, તે આ જ આરોપી છે. એક અલગ કેસમાં ખાર પોલીસે બે દિવસ પહેલા ડ્રગ સપ્લાયરની ધરપકડ કરી હતી. એવી આશંકા છે કે તેણે ૩૧ ડિસેમ્બરની રાત્રે ખારમાં યોજાયેલી પાર્ટીમાં કેટલાક વિદ્યાર્થીઓને ડ્રગ્સ સપ્લાય કર્યો હતો. તે રાત્રે ૧૯ વર્ષીય જાહ્નવી કુકરેજા કેટલાક વિદ્યાર્થીઓ વચ્ચેની લડાઇમાં મોત નીપજ્યું હતું. પોલીસે તે કેસમાં મર્ડર સેક્શન ૩૦૨ લગાવી છે અને શ્રી જોગધનકર અને દીયા પડાલકર નામના બે વિદ્યાર્થીઓની ધરપકડ કરી છે.

નવા વર્ષની આ પાર્ટીમાં લગભગ એક ડઝન જેટલા વિદ્યાર્થીઓ શામેલ થયા હતા. પોલીસે દરેકને યૂરિન અને બ્લડ ટેસ્ટ કરવામાં આવ્યા છે, જેથી જાણી શકાય કે તે રાત્રે કોણે ડ્રગ્સ લીધું હતું. પોલીસ પણ તપાસ કરી રહી છે કે જો કેટલાક વિદ્યાર્થીઓ ડ્રગ્સ લીધું હતું તો તેઓ તેનું સેવન પાર્ટીમાં આવતા પહેલા ઘરેથી કર્યું હતું કે, પાર્ટી દરમિયાન જ તેઓને ડ્રગ્સ સપ્લાય કર્યું હતું? આ આખો મામલો ત્યારે પ્રકાશમાં આવ્યો જ્યારે તપાસ ટીમને જાણવા મળ્યું કે ધરપકડ કરાયેલા આરોપીઓમાંથી એક શ્રી જોગધનકર પાર્ટી શરૂ કરતા પહેલા જ ગાંજા લઈ ગયો હતો.