Gujarati News

જયપુરઃ પેટ્રોલ-ડીઝલની કિંમતમાં થઈ રહેલા સતત વધારાના વિરોધમાં કોંગ્રેસે સોમવારના દિવસે ભારત બંધની જાહેરાત કરી તેના કલાકો પહેલા જ રાજસ્થાનના મુખ્યમંત્રી વસુંધરા રાજેએ પેટ્રોલ અને ડીઝલ પર લાગતા વેટમાં 4 ટકાનો ઘટાડો કર્યો છે. ઉલ્લેખનીય છે કે રાજસ્થાનમાં વિધાનસભાની ચૂંટણી નજીક છે ત્યારે ભાવમાં ઘટાડો રાજસ્થાન સરકાર માટે ફાયદાકારક સાબિત થાય.

રવિવારે મધ્યરાત્રિથી આ નવા ભાવ લાગુ થયા હતા. પેટ્રોલ પરથી VAT 30 ટકાથી ઘટીને 26 ટકા કરવામાં આવ્યો છે જ્યારે ડીઝલનો VAT 22 ટકાથી ઘટાડીને 18 ટકા કરવામાં આવ્યો છે. આનાથી પેટ્રોલ અને ડીઝલના ભાવમાં 2.50થી 3 રુપિયા પ્રતિ લીટર જેટલો ઘટાડો થશે.

વસુંધરા રાજેએ રાજસ્થાન ગૌરવ યાત્રા દરમિયાન વેટમાં ઘટાડાની જાહેરાત કરી હતી. તેમણે જણાવ્યું કે, રાજ્યની તિજોરી પર આના કારણે 2000 કરોડ રુપિયાનો બોજ વધશે પરંતુ આ કોઈ વ્યક્તિની ઈચ્છાનો સવાલ છે. પૈસા અમે મેનેજ કરી લઈશુ.

વસુંધરા રાજેએ દાવો કર્યો છે કે, તેમના આ નિર્ણયથી દરેકના પરિવારને રાહત થશે. વસુંધરા જણાવે છે કે, યાત્રા દરમિયાન મને પેટ્રોલ-ડીઝલના ભાવવધારા વિષે અનેક ફરિયાદો મળી. મને પણ લાગ્યું કે, આ ભાવવધારો દરેકના જીવનને અસર કરી રહ્યો છે. રાજ્યને આ નિર્ણયને કારણે થોડું નુકસાન થશે, પરંતુ સામાન્ય વ્યક્તિને રાહત થઈ જશે.