Gujarati News

નવીદિલ્હી તા.૧૦: દેશભરમાં લકોના પ્રોફાઇલ સંગ્રહ કરવા માટે DNA ડેટા બેન્ક તૈયાર કરવાની તેમ જ આ સુવિધામાંથી માહિતી લીક કરવાની કોશિક કરનારાઓ માટે જેલની સજા કરવાની જોગવાઇ ધરાવતો ખરડો ગઇ કાલે લોકસભામાં રજૂ કરવામાં આવ્યો હતો. આ ખરડામાં જણાવાયું હતું કે DNA  પ્રોફાઇલ, સેમ્પલ અને રેકોર્ડ સહિતનો તમામ ડેટા વ્યકિતની ઓળખ સાબિત કરવા માટે જ ઉપયોગમાં લેવાશે, અન્ય કોઇ કામ માટે નહીં.

તાજેતરમાં લો કમિશન દ્વારા તૈયાર કરેલા ડ્રાફટના આધાર પર તૈયાર કરવામાં આવેલા ખરડામાં જણાવાયું છે કે ' શકમંદ, કાચા કેદી, લાપતા થયેલી વ્યકિતઓ, બિનવાસર મૃતદેહની ઓળખ પ્રસ્થાપિત કરવા માટે નેશનલ ડેટાબેઝ જાળવવા નેશનલ અને રીજનલ ડેટા બેન્ક તૈયાર કરવામાં આવશે.'

આ ખરડા મુજબ આ માહિતી મેળવવાનો અધિકારી ધરાવતી ન હોય એવી વ્યકિત કે સંસ્થાને DNA પ્રોફાઇલની માહિતી ગેરકાયદે રીતે આપનારને ત્રણ વર્ષ સુધીની જેલ અને એક લાખ રૂપિયા સુધીનો દંડ થઇ શકે છે. આ ખરડાની જોગવાઇઓ મુજબ ગુમ થયેલા માણસની તપાસ માટે DNA નું ક્રોસમેચિંગ કરવા, દેશના વિવિધ વિસ્તારોમાંથી મળતા  મૃતદેહોની અને કુદરતી હોનારતનો ભોગ બનેલાઓની ઓળખ સ્થાપિત કરવા DNA પ્રોફાઇલનો ઉપયોગ કરી શકાશે.(૧.૫)