Gujarati News

જયપુરઃ જયપુરમાં રહેતા દુષ્‍યંત શર્માની ઓનલાઇન ડેટિંગ અને ચેટિંગના કારણે હત્યા થતા ખળભળાટ મચી ગયો છે. ડેટિંગ એપ ટિન્ડર પર ખુદને કરોડપતિ બતાવનાર દુષ્યંતનો મૃતદેહ 3મેના રોજ દિલ્હી હાઈવે પર એક સૂટકેસમાંથી મળી આવ્યો. કહેવામા આવી રહ્યું છે કે જેની સાથે રિલેશનમાં હતો તે છોકરીએ જ દુષ્યંતની હત્યા કરી છે.

પોલીસ મુજબ આરોપી પ્રિયા શેઠ જ આ હાઈ પ્રોફાઇલ હત્યા અને બ્લેકમેઇલિંગ રેકેટ પાછળની માસ્ટરમાઇન્ડ છે. તે દુષ્યંતને પણ પોતાની જાળમાં ફસાવીને તેની પાસેથી પૈસા પડાવવા માગતી હતી. 2018માં એક અન્ય બિઝનેસમેનને ધમકાવવાના આરોપસર ધરપકડ થેલી પ્રિયા હાલ જામીન પર બહાર હતી પરંતુ આ ઘટના સામે આવતાની સાથે જ તેની ધરપકડ કરી લેવામા આવી છે. પ્રિયાની સાથે તેના બૉયફ્રેન્ડ દીક્ષાંત કામરા અને એક અન્ય શખ્સ લક્ષ્ય વાલિયાની પણ ધરપકડ કરી લેવામાં આવી છે.

પોલીસ મુજબ પ્રિયાએ પહેલાં દુષ્યંત શર્માને એક ફ્લેટમાં બંદી બનાવ્યો હતો અને બાદમાં દુષ્યંતના પિતા પાસેથી 3 લાખની ખંડણી વસૂલ્યા બાદ દુષ્યંતની હત્યા કરી મૂકી હતી. ઝોટવારાના એસએચઓ ગુરુ ભૂપેન્દ્ર સિંહે જણાવ્યું કે, ‘ખંડણીની રકમ મળી ગઇ હોવા છતાં પ્રિયાએ દુષ્યંતને જીવતો ન છોડ્યો, હત્યા પહેલાં દુષ્યંતને માર મારી વાયર સાથે બાંધી દીધો હતો. જ્યારે પ્રિયાએ દુષ્યંત પાસેથી 10 લાખ રૂપિયા માંગ્યા ત્યારે દુષ્યંતે પોતે કરોડપતિ ન હોવાનો ખુલાસો કર્યો. પ્રિયાએ દુષ્યંતના ડૉક્યુમેન્ટ્સ ચેક કર્યાં તો માલુમ પડ્યું કે એના બેંક અકાઉન્ટમાં પણ અમુક હજાર રૂપિયા જ હતા.’

ગુરુવારે સવારે 10 વાગ્યે પ્રિયાએ દુષ્યંતના પિતા રાજેશ્વરને ફોન કરીને 10 લાખ રૂપિયાની ખંડણી માંગ હતી, ત્યારે દુષ્યંતના પિતાએ માત્ર 3 લાખ રૂપિયા જ આપી શકે તેમ જણાવ્યું હતું. દુષ્યંતના અકાઉન્ટમાં જેવા રૂપિયા ટ્રાન્સફર થયા કે ત્રણેય આોપીઓને પોલીસ સુધી મામલો પહોંચી જશે તેવો ડર લાગ્યો. ગભરાયેલા આરોપીઓએ ચાકુના ઘા મારી દુષ્યંતની હત્યા કરી હતી. બાદમાં દુષ્યંતના અકાઉન્ટમાંથી 20 હજાર રૂપિયા ઉપાડી પ્રિયાએ એક મોટી સૂટકેસ ખરીદી હતી. આ સૂટકેસમાં જ દુષ્યંતનો મૃતદેહ રાખીને તેને ફેંકી આવ્યા હતા.

આજના સમયમાં ડેટિંગ એપ અને વેબસાઇટનો રાફડો ફાટ્યો છે. ત્યારે મોટા ભાગના યુવાનો ઓનલાઇન જ રાઇટ કે લેફ્ટ સ્વાઇપ કરવાનું પસંદ કરતા હોય છે પરંતુ રાઇટ સ્વાઇપ કરવાના ચક્કરમાં ક્યારેક રોન્ગ ડિસિઝન લઇ લેતા હોય છે. કોઇપણ અજાણી ગર્લથી આકર્ષાઇને લોકો જ્યાં બોલાવે ત્યાં મળવા જતા રહે છે. ત્યારે અજાણી વ્યક્તિને ડેટ પર લઇ જતા પહેલાં તેના વિશે રિસર્ચ કરી લેવું ખાસ જરૂરી છે. શક્ય હોય તો તેને કહો કે ઘરેથી વીડિયો કોલ કરે. જ્યાં સુધી ગર્લ કે બૉયના પરિજનો સાથે પરિચય ન થઇ જાય ત્યાં સુધી પબ્લિકમાં જ મળવાનું રાખો, અને ખાસ વાત એ કે ડેટિંગ એપ પર તમારી આવક કે પછી તમે શું કરો છો તે ક્યારેય છતું ન કરવું, આ માહિતી તો તમે તમારી ડેટને મળો ત્યારે પણ જણાવી શકો.