Gujarati News

નવી દિલ્હી તા. ૧૦: ટીવી પર ટીઆરપી ખેંચી લાવવાનું કામ જો આ દેશમાં કોઇ કરતું હોય તો એ અમિતાભ બચ્ચન પણ નથી અને સચિન તેંડુલકર કે વિરાટ કોહલી પણ નથી. ટીઆરપી મીટર પર સૌથી ટોચ પર દેશમાં જો કોઇ નામ હોય તો એ દેશના વડા પ્રધાન નરેન્દ્ર મોદીનું છે. ટીવી-ઓડિયન્સના ડેટા પર કામ કરતી બ્રોડકાસ્ટ ઓડિયન્સ રિસર્ચ કાઉન્સિલે આપેલા આંકડા મુજબ નરેન્દ્ર મોદીએ ર૧ દિવસના લોકડાઉનની જાહેરાત કરી એ ર૪ માર્ચની તેમની સ્પીચ ૧૯.૭ કરોડ લોકોએ જોઇ હતી. કોઇ એક ઇવેન્ટમાં હાઇએસ્ટ ટીઆરપીનો રેકોર્ડ છે. આ અગાઉ ગયા વર્ષે આઇપીએલની ફાઇનલ મેચ ૧૩.૩ કરોડ લોકોએ જોઇ હતી, જે અત્યાર સુધીની સિંગલ ઇવેન્ટની હાઇએસ્ટ ટીઆરપી હતી.

આ અગાઉ નરેન્દ્ર મોદીએ જયારે નોટબંધીની અનાઉન્સમેન્ટ કરી હતી એ સ્પીચને પ.૭ કરોડની વ્યુઅરશિપ મળી હતી તો આર્ટિકલ-૩૭૦ની અનાઉન્સમેન્ટની સ્પીચ દેશના ૧૬.૩ કરોડ લોકોએ સાંભળી હતી તો જનતા કફર્યુની અનાઉન્સમેન્ટની સ્પીચ ૧૯.૧ કરોડ લોકોએ સાંભળી હતી. આ બધા રેકોર્ડને નરેન્દ્ર મોદીએ ર૪ માર્ચે તોડયો તો એ પછીનો નવો રેકોર્ડ પણ મોદીએ જ બનાવ્યો અને પોતાનો રેકોર્ડ પણ મોદીએ જ તોડયો છે.

દીવા કરવાનું સુચન કરવા માટે નરેન્દ્ર મોદીએ વિડિયો-સંદેશ આપ્યો જે દેશની ર૧.૮ કરોડ જનતાએ સાંભળ્યો, જે ૩ એપ્રિલની સવારે ૯ વાગ્યે ઓનએર થયો હતો. એવું અનુમાન બાંધવામાં આવેછે કે લોકડાઉનની અવધિ પૂરી થયા પછી નરેન્દ્ર મોદી જે સ્પીચ આપવા આવશે એની વ્યુઅરશિપ આ રેકોર્ડને તોડી નાખશે.