Gujarati News

પટણા, તા.૧૦: બિહારની રાજધાની પટણામાં ડિવોર્સનો એક વિચિત્ર કિસ્સો સામે આવ્યો છે. અહીં એક પત્નીએ પોતાના પતિની ગંદી હરકતોથી કંટાળીને ડિવોર્સની અરજી કરી છે. પત્નીનો આરોપ છે કે તેનો પતિ નાહતો પણ નથી અને બ્રશ પણ નથી કરતો. ગુરુવારે પટણા સ્થિત મહિલા આયોગની ઓફિસમાં આ અજીબોગરીબ મામલો સામે આવ્યો. પીડિત પત્ની મુજબ પતિના બ્રશ ન કરવાના કારણે તેના મોઢામાંથી વાસ આવતી હતી. સાથે જ તે રોજ નાહવાને બદલે ૧૦-૧૦ દિવસે એક વખત નાહતો હતો.પતિની ગંદી આદતોથી કંટાલીને તેની પત્નીએ મહિલા આયોગમાં ડિવોર્સની અરજી કરી છે અને હવે તે પતિથી છૂટકારો ઈચ્છે છે. પીડિત પત્નીનું નામ સોની દેવી છે. સોનીના લગ્ન ૨૦૧૭માં મનીષ રામ સાથે થયા હતા.

સોની દેવી મુજબ લગ્ન પહેલા તે છોકરાને મળી નહોતી અને તેમના વચ્ચે કોઈ વાત પણ નહોતી થઈ. પહેલીવાર તેણે પોતાના પતિને લગ્નના મંડપમાં જોયો હતો. લગ્ન બાદ વિદાય લઈને સાસરે આવેલી સોની દેવી પતિની આવી ગંદી આદતોથી પરેશાન થઈ ગઈ. સોનીનું કહેવું છે કે હવે તેમના વચ્ચે પતિ-પત્નીનો સંબંધ પણ નથી રહ્યો. આથી તે પતિથી છૂટકારો મેળવવા ઈચ્છે છે.

તો બીજી તરફ મહિલા આયોગે સમજદારી દર્શાવતા કપલના સંબંધને બચાવવા માટે પતિ-પત્નીને વધુ એક તક આપી છે. આયોગે આ સાથે જ બે મહિના આગળની તારીખ આપી છે. મહિલા આયોગની સદસ્ય પ્રતિમા સિંહાએ કહ્યું કે બંનેને એક તક આપવામાં આવી છે. સાથે જ પતિ મનીષ રામને નિયમિત રીતે નાહવા અને બ્રશ કરવા માટે સમજાવાયો છે.