Gujarati News

સવાઇ માધોપુર તા. ૯ : કોંગ્રેસ નેતા સોનિયા ગાંધી તેમનો ૭૬મો જન્‍મદિવસ રાજસ્‍થાનના રણથંભોરમાં ઉજવશે. તે ચાર દિવસના પ્રવાસે રાજસ્‍થાન આવી છે. કહેવામાં આવી રહ્યું છે કે સોનિયા ગાંધી પણ ભારત જોડો યાત્રામાં ભાગ લેશે.

સોનિયા ગાંધી પાર્ટીના સાંસદોની બેઠકની અધ્‍યક્ષતા કરવાના હતા અને કેટલાક સાંસદોને સંદેશ પણ મોકલવામાં આવ્‍યો હતો કે તેઓ આ બેઠકમાં હાજર રહે. જોકે, છેલ્લી ઘડીએ પ્‍લાન બદલાઈ ગયો અને તે રાજસ્‍થાનના પ્રવાસે રવાના થઈ ગયા. પ્રિયંકા ગાંધી પણ રાજસ્‍થાન પહોંચી ગયા છે. ગુરુવારે ભારત જોડો યાત્રાનો કાર્યક્રમ ટૂંકો હતો. યાત્રી સવારમાં જ નીકળે છે. સાંજે પ્રવાસ રદ કરવામાં આવ્‍યો હતો. શુક્રવાર ભારત જોડો યાત્રાનો વિરામ દિવસ છે. રાહુલ ગાંધી ગુરૂવારે જ બુંદીથી રણથંભોર જવા રવાના થયા હતા.

ગાંધી પરિવાર રણથંભોર ટાઈગર રિઝર્વ પાસે આવેલા વૈભવી રિસોર્ટ સુજાન શેર બાગમાં રહે છે. જેના માલિક અંજલિ અને જેસલ સિંહ છે, જેઓ ગાંધી પરિવારના મિત્રો છે. ખાસ વાત એ છે કે પ્રિયંકા ગાંધીએ અંજલિ અને જેસલ સિંહ સાથે મળીને ‘રણથંભોરઃ ધ ટાઈગર્સ રિયલમ' પુસ્‍તકની સહલેખક છે.

જયપુરથી સોનિયા ગાંધી ગુરૂવારે હેલિકોપ્‍ટર દ્વારા સવાઈ માધોપુર પહોંચ્‍યા હતા. થોડા કલાકો બાદ રાહુલ અને પ્રિયંકા પણ તેમની માતા પાસે આવેલા રિસોર્ટમાં પહોંચી ગયા હતા. સૂત્રોએ જણાવ્‍યું કે સોનિયા ગાંધીની સાથે પ્રિયંકા પણ ૧૦ ડિસેમ્‍બરના રોજ ભારત જોડો યાત્રામાં ભાગ લેશે, જે મહિલા પ્રતિભાગીઓ માટે આરક્ષિત દિવસ છે. એવી શક્‍યતા છે કે મુખ્‍યમંત્રી અશોક ગેહલોત અને પ્રદેશ કોંગ્રેસ અધ્‍યક્ષ ગોવિંદ સિંહ દોતાસરા તેમના જન્‍મદિવસ પર તેમને મળી શકે છે.

હિમાચલ પ્રદેશ-ગુજરાત વિધાનસભા ચૂંટણી અને સરદારશહેર વિધાનસભા પેટાચૂંટણીના પરિણામો બાદ સમગ્ર ગાંધી પરિવાર એક સાથે છે. આવી સ્‍થિતિમાં ચૂંટણીના પરિણામ પર ચર્ચા થાય તેવી પૂરી સંભાવના છે. હિમાચલમાં કોંગ્રેસે જીત નોંધાવી છે. આવી સ્‍થિતિમાં ચૂંટણી પરિણામોની સાથે આગળની રણનીતિ પર પણ ચર્ચા કરવામાં આવશે.