Gujarati News

ઉત્તર પ્રદેશના મેરઠ શહેરના ટ્રાન્સપોર્ટ નગર પોલીસ સ્ટેશન વિસ્તારની ન્યૂ મેવલા કોલોની સ્થિત તેના ઘરના ગેટ પર અજાણ્યા હુમલાખોરોએ મહિલા વકીલને માથા પર ગોળી મારી હતી.  પોલીસે જણાવ્યું કે આ વકીલનો તેના પૂર્વ પતિ અને પૂર્વ સસરા સાથે મિલકતનો વિવાદ ચાલી રહ્યો હતો.

વકીલ અંજલિ ગર્ગને માથામાં ગોળી વાગી હતી અને તે ટ્રાન્સપોર્ટ નગર પોલીસ સ્ટેશન વિસ્તારની ન્યૂ મેવલા કોલોની સ્થિત તેના ઘરના ગેટ પર પડી હતી.

અંજલિએ પખવાડિયા પહેલા પોતાની સુરક્ષા અંગે ચિંતા વ્યક્ત કરીને પોલીસનો સંપર્ક કર્યો હતો. તેના સંબંધીઓએ તેના પૂર્વ સસરા પવન ગર્ગ અને પૂર્વ પતિ નીતિન ગર્ગ વિરુદ્ધ પોલીસ ફરિયાદ નોંધાવી છે.  આ ગુનામાં બંનેની ધરપકડ કરવામાં આવી છે.

પોલીસે જણાવ્યું કે છૂટાછેડા પછી અંજલિનો તેના પૂર્વ પતિના પરિવાર સાથે મિલકતનો વિવાદ ચાલી રહ્યો હતો.

એસપી (સિટી) પિયુષ કુમારે જણાવ્યું કે, અંજલિ અને તેના પતિ નીતિન ગર્ગના ૨૦૨૦માં છૂટાછેડા થઈ ગયા હતા. સમાધાનના ભાગરૂપે અંજલિએ પાંચ દુકાનોના બદલામાં ઘર ખાલી કરવું પડ્યું. જો કે, તેણે કરારનું પાલન ન કર્યું, જેના કારણે તેની અને ગર્ગ પરિવાર વચ્ચે તણાવ વધ્યો. અંજલિએ દુકાનો ભાડે આપીને કમાણી કરી અને સમયની સાથે આ વિવાદ વધતો ગયો.