Gujarati News

જેટ એરવેઝ,તા.૯: આખરે ફરી એકવાર જેટ એરવેઝ ઉડાન ભરવા માટે તૈયાર છે. હવે કેન્‍દ્રીય ગૃહ મંત્રાલયે રવિવારે જેટ એરવેઝને સુરક્ષા મંજૂરી આપી છે. જેટ એરવેઝ આવતા મહિનાથી કોમર્શિયલ ફલાઈટ ચલાવી શકે છે. ૫ મેના રોજ એરલાઇન કંપનીએ એર ઓપરેટર સર્ટિફિકેટ માટે હૈદરાબાદથી ટેસ્‍ટ ફલાઇટ લીધી હતી. કંપનીએ ટ્‍વીટ કરીને આ અંગેની માહિતી આપી હતી.

કંપનીએ ૧૭ એપ્રિલ, ૨૦૧૯ ના રોજ કામગીરી બંધ કરી દીધી હતી કારણ કે તે નાદાર બની હતી. આ પછી, ત્રણ વર્ષ પછી, કંપનીએ પ્રથમ વખત પરીક્ષણ માટે ઉડાન ભરી. જેટ એરવેઝના સીઈઓ સંજીવ કપૂરે કહ્યું હતું કે તેઓ એર ઓપરેટર પરમિટ (AOP) ના પુનઃપ્રમાણીકરણની પ્રક્રિયાને મંજૂરી આપ્‍યાના થોડા મહિના પછી એરલાઈન ફરીથી કામગીરી શરૂ કરવાની અપેક્ષા રાખે છે.

તમને જણાવી દઈએ કે એપ્રિલ ૨૦૧૯માં  નાણાકીય સંકટનો સામનો કરી રહેલી જેટ એરવેઝે છેલ્લી વખત ઉડાન ભરી હતી. આ પછી કંપનીની ફલાઈટ સેવાઓ ઠપ થઈ ગઈ. જો કે, મુરારી લાલ જાલાન અને CalRock કન્‍સોર્ટિયમે જૂન ૨૦૨૧માં નેશનલ કંપની લો ટ્રિબ્‍યુનલ (NCLT) દ્વારા દેખરેખ હેઠળની નાદારી અને રિઝોલ્‍યુશન પ્રક્રિયામાં જેટ એરવેઝની બિડ જીતી લીધી હતી. હવે એવી અપેક્ષા છે કે સપ્‍ટેમ્‍બર સુધીમાં જેટ એરવેઝની ફલાઈટ સેવાઓ ફરી એકવાર શરૂ થઈ જશે. આ સંદર્ભમાં કંપની દ્વારા સંકેતો પણ આપવામાં આવ્‍યા છે.