Gujarati News

Gujarati News

News of Thursday, 8th March 2018

૨૯ વખત મોદી સમક્ષ મદદ માટે રજૂઆત કરાઈ : નાયડુ

આંધ્રને લઇને અપાયેલા ૧૯ વચનો પળાયા નથી : પૂર્વોત્તર રાજ્યોને લઇને મજબૂતી સાથે કામ થઇ રહ્યું છે પરંતુ આંધ્રની સાથે ભેદભાવ : ચંદ્રાબાબુ નાયડુનો દાવો

નવીદિલ્હી,તા. ૮ : આંધ્રપ્રદેશને ખાસ રાજ્યનો દરજ્જો આપવાના મુદ્દે રાજકીય ગરમી વધી ગઈ છે. રાજ્યમાં ચંદ્રાબાબુ નાયડુ સરકારમાંથી ભાજપના બે પ્રધાનોએ રાજીનામા આપી દીધા છે. નાયડુએ આજે રાજ્ય વિધાનસભામાં વાત કરતા કહ્યું હતું કે, મોદી સરકાર સાથે અલગ થવાના નિર્ણયને લઇને કોઇ દુવિધા નથી. બિલકુલ યોગ્ય નિર્ણય લેવામાં આવ્યો છે. નાયડુએ કહ્યું હતું કે, ૨૯ વખત દિલ્લી ગયા હોવા છતાં અમને વડાપ્રધાન તરફથી કોઇ નક્કર ખાતરી મળી ન હતી. નાયડુએ આ ગાળા દરમિયાન પોતાની સરકારનો હિસ્સો રહેલા ભાજપના પ્રધાનોની પણ પ્રશંસા કરી હતી. વિધાનસભામાં નાયડુએ પોતાના મંત્રીઓના રાજીનામાની માહિતી આપતા કહ્યું હતું કે, કેન્દ્રીય કેબિનેટમાં અમારા મંત્રીઓ અને અમારી કેબિનેટમાં ભાજપના પ્રધાનો રાજીનામા આપી રહ્યા છે. અલબત્ત ભાજપના મંત્રીઓએ રાજ્યમાં ખુબ સારી કામગીરી અદા કરી હતી. પોતપોતાના વિભાગમાં ભાજપના મંત્રીઓ અસરકારક રહ્યા હતા. નાયડુએ કહ્યું હતું કે, તેઓ ૨૯ વખત દિલ્હી જઇને આંધ્રપ્રદેશ માટે રજૂઆત કરી હતી પરંતુ તેમની તરફથી કોઇ પહેલ થઇ ન હતી. તેમણે એમ પણ કહ્યું હતું કે, નવા પાટનગરને વિકસિત કરવા માટે ફંડ, પાવરલુમ પ્રોજેક્ટ અને વિશાખાપટ્ટનમ માટે આપવામાં આવેલા વચનો પુરા થયા નથી. નાયડૂએ ભારપૂર્વક કહ્યું હતું કે, આંધ્રપ્રદેશ વિભાજન એક્ટ હેઠળ કરવામાં આવેલા તમામ ૧૯ વચનોને પૂર્ણ કરવામાં આવ્યા નથી. કેન્દ્ર સરકાર સાથે છેડો ફાડી લેવાના નિર્ણય અંગે કહ્યું હતું કે, તમામ પ્રયાસો છતાં કોઇ કામગીરી ન થતાં આખરે છેડો ફાડી લેવામાં આવ્યો છે. કેન્દ્ર સરકાર સાથે છેડો ફાડવાના નિર્ણયને યોગ્ય ઠેરવતા નાયડુએ કહ્યું હતું કે, અરુણ જેટલીએ બુધવારે જે કહ્યું તે યોગ્ય નથી. પૂર્વોત્તર રાજ્યોમાં મજબૂતી સાથે કામ થઇ રહ્યું છે પરંતુ આંધ્રપ્રદેશને પ્રોત્સાહન આપવામાં આવી રહ્યું નથી.

(7:46 pm IST)
  • મહાત્મા ગાંધી દ્વારા હસ્તાક્ષર કરાયેલ એક દુર્લભ ફોટો અમેરિકામાં 41,806 ડોલર એટલે કે 27 લાખ 22 હજાર 615 રૂપિયામાં વેચાણ કરવામાં આવ્યો છે. તસ્વીરમાં ગાંધીજીને મદન મોહન માલવિયા સાથે જોવામાં આવી રહ્યા છે. બોસ્ટન સ્થિત આરઆર ઓકશન મુજબ, આ ફોટો સપ્ટેમ્બર 1931 માં લંડનમાં બીજા રાઉન્ડ ટેબલ કોન્ફરન્સ પછી લેવામાં આવ્યો હતો. આ દુર્લભ ચિત્ર પર, મહાત્મા ગાંધીએ ફાઉન્ટેન પેન દ્વારા 'એમ કે ગાંધી' લખીને પોતાના હસ્તાક્ષર કર્યા છે. access_time 2:53 pm IST

  • જગવિખ્યાત સુફી ગાયક બેલડી વડાલી બ્રધર્સમાં નાના ભાઈ ઉસ્તાદ પ્યારેલાલ વડાલીનું 75 વર્ષની ઉમંરે હાર્ટ એટેકમાં મૃત્યુ થયુ છે. પ્યારેલાલ છેલ્લા કેટલાક સમયથી બીમાર હતા અને ગઈ કાલે તેમને હાર્ટ એટેક આવ્યો હતો. ગઈ કાલે તેમને અમૃતસરની ફોર્ટિસ હોસ્પિટલમાં દાખલ કરવામાં આવ્યા હતાં. ત્યાં આજે સવારે તેમણે અંતિમ શ્વાસ લીધા હતા. પ્યારેલાલ વડાલીના નિધન વિશે તેમના ભત્રીજા લખવિંદર વડાલીએ જાણ કરી હતી. access_time 1:04 pm IST

  • એસટી બસનું છેલ્લા બે વર્ષમાં સરકારી કાર્યક્રમોમાં ભારે ઉપયોગ, તેમ છતાં ભાડાની પૂરી રકમ હજુ સુધી ચૂકવાઈ નથી : બે વર્ષમાં ૪૭૦૪૧ બસો દોડાવાઈ : પરંતુ ભાડાપેટાની ૨૨.૭૮ કરોડ જેવી રકમ ચૂકવાઈ નથી access_time 5:53 pm IST