Gujarati News

જૌનપુર, તા.૯: એકબીજાના પ્રેમમાં અંધ થઈને કંઈ પણ વિચાર્યા વગર યુવક અને યુવતી ઘરેથી ભાગી ગયા હોય તેવા ઘણા કિસ્‍સા આપણા સમાજમાં બનતાં આવ્‍યા છે અને બનતાં રહે છે. જો કે, હવે તો પરિણીતસ્ત્રી અને પુરુષ પણ આમ કરવા લાગ્‍યા હોય તેવું જોવા મળે છે. પરિવારના બાકીના સભ્‍યો તો ઠીક માસૂમ બાળકોનો પણ તેઓ ખયાલ રાખતા નથી. ઉત્તરપ્રદેશના જૌનપુર જિલ્લામાંથી હાલમાં આવો જ કંઈક ચોંકાવનારો કેસ સામે આવ્‍યો. જ્‍યાં પતિની ગેરહાજરીમાં મહિલા તેની સગી બહેનના પતિ એટલે કે જીજાજી સાથે ભાગી ગઈ. આખા વિસ્‍તારમાં આ વાત આગની જેમ ફેલાઈ અને સૌ કોઈ તેની જ ચર્ચા કરવા લાગ્‍યા. કેટલાકે હાંસી ઉડાવી તો કેટલાકે મહિલાના પતિ પ્રત્‍યે દયા દાખવી. સૌથી નવાઈની વાત તો એ છે કે, પતિ જ્‍યારે ઘરે ગયો અને બાળકોએ જણાવ્‍યું ત્‍યારે તેને ઘટનાની જાણ થઈ.

જૌનપુર જિલ્લામાં આવેલા ધર્મસારી ગામમાં રહેતા ધર્મેન્‍દ્ર ધરિકારે બુધવારે ખુટહન પોલીસ સ્‍ટેશનમાં ફરિયાદ નોંધાવી હતી. જેમાં તેણે પત્‍નીને સાઢુ ફોસલાવીને ભગાડીને લઈ ગયો હોવાનો આક્ષેપ લગાવ્‍યો હતો. આરોપી સાઢુ રાજેશ ધરિકાર ખુટહન પોલીસ સ્‍ટેશનના વિસ્‍તારમાં આવતાં ગાયત્રી નગર ડિહિયાનો રહેવાસી છે. ધર્મેન્‍દ્રએ ફરિયાદમાં જણાવ્‍યું હતું કે, સંબંધી હોવાના નાતે રાજેશ અવારનવાર તેના ઘરે આવતો હતો. ધીમે-ધીમે તેણે પત્‍નીને ફોસલાવી હતી. સોમવારે તે કોઈ કામના સંદર્ભમાં ઘર બહાર ગયો હતો. સાઢુએ લાભ ઉઠાવ્‍યો હતો અને તેની પત્‍નીને ભગાડી ગયો હતો.

ધર્મેન્‍દ્ર કામ પતાવીને બીજા દિવસે એટલે કે મંગળવારે ઘરે આવ્‍યો હતો. તે સમયે પત્‍નીને ન જોતાં બાળકોને પૂછયું હતું. ત્‍યારે તેમણે મમ્‍મી માસા સાથે કયાંક બહાર ગઈ હોવાનું કહ્યું હતું. આખો દિવસ રાહ જોયા બાદ પણ તે પરત ન ફરતાં બીજા દિવસે પોલીસ સમક્ષ ફરિયાદ નોંધાવી હતી. ધર્મેન્‍દ્રને બે બાળકો છે, જે તેની મમ્‍મી ભાગી જવાના કારણે નોંધારા બન્‍યા છે.