Gujarati News

નવી દિલ્‍હી, તા.૯: અમેરિકાએ ભારત દ્વારા રશિયા પાસેથી તેલની ખરીદી (રશિયા ઓઈલ એક્‍સપોર્ટ્‍સ) અંગે પોતાનું સ્‍ટેન્‍ડ ક્‍લિયર કર્યું છે. યુરોપીયન અને યુરેશિયન બાબતોના યુએસ આસિસ્‍ટન્‍ટ સેક્રેટરી ઓફ સ્‍ટેટ કેરેન ડોનફ્રાઈડે બુધવારે જણાવ્‍યું હતું કે રશિયા પાસેથી તેલ ખરીદવામાં ભારત દ્વારા અપનાવવામાં આવેલા અભિગમથી અમેરિકા સહજ છે. તે જ સમયે, તેમણે કહ્યું કે ભારત પર પ્રતિબંધ મૂકવાનો કોઈ વિચાર નથી, કારણ કે બંને દેશો વચ્‍ચેના સંબંધો ખૂબ મહત્‍વપૂર્ણ છે.

જ્‍યારે મીડિયા દ્વારા રશિયા પાસેથી ભારતની ઓઈલની ખરીદી અંગે પૂછવામાં આવ્‍યું તો ડોનફ્રાઈડે કહ્યું કે અમે ભારત પર પ્રતિબંધ લાદવાનું વિચારી રહ્યા નથી. ભારત સાથેના આપણા સંબંધો સૌથી વધુ ફળદાયી સંબંધો છે. તેઓએ માનવતાવાદી સહાય પૂરી પાડીને યુક્રેનના લોકો માટે ભારતના સમર્થનને આવકાર્યું અને યુક્રેન સામે રશિયાના ઉશ્‍કેરણી વિનાના યુદ્ધને તાત્‍કાલિક સમાપ્ત કરવાના ભારતના આહ્વાનનું પણ સ્‍વાગત કર્યું.

તેમણે વધુમાં કહ્યું કે આ દાયકાના અંત સુધીમાં રશિયાના તેલ અને ગેસના ઉત્‍પાદનમાં ૫૦ ટકાનો ઘટાડો થશે. અમે પ્રતિબંધની નીતિમાં માનતા નથી. ભારતે લીધેલા સ્‍ટેન્‍ડથી અમને કોઈ વાંધો નથી. રશિયાની બજેટ ખાધમાં પરિણામો પહેલેથી જ દેખાઈ રહ્યા છે. અમેરિકી સહાયક વિદેશ મંત્રીએ વધુમાં કહ્યું કે અમે વડાપ્રધાન નરેન્‍દ્રભાઇ મોદીના દાવાને આવકારીએ છીએ કે આજનો યુગ યુદ્ધનો નથી.

આ સાથે તેમણે કહ્યું કે અમે ગયા વર્ષે નવેમ્‍બરમાં બાલી G20 સમિટમાં વાતચીત અને કૂટનીતિ માટે પીએમ મોદીની ટિપ્‍પણીઓનું સ્‍વાગત કરીએ છીએ. તેમણે કહ્યું કે G20 પ્રમુખ તરીકે ભારતની નેતળત્‍વની ભૂમિકા પ્રશંસનીય છે. આ સિવાય તેમણે પુતિન પર પણ નિશાન સાધ્‍યું હતું. તેમણે કહ્યું કે રશિયાના તેલ અને ગેસ સંસાધનોને હથિયાર બનાવીને પુતિને બતાવ્‍યું છે કે રશિયા ફરી કયારેય ભરોસાપાત્ર ઉર્જા સપ્‍લાયર નહીં બને. રશિયાએ પણ વૈશ્વિક તેલ અને ગેસના ભાવમાં વધારો કર્યો હતો, જે હજુ પણ વિશ્વભરમાં ચાલુ છે.

છેલ્લા મહિનાઓમાં, ભારત વધુને વધુ સસ્‍તું રશિયન તેલ ખરીદી રહ્યું છે અને તેને યુરોપ અને યુએસ માટે ઇંધણ તરીકે રિફાઇન કરી રહ્યું છે. ભારતમાં શુદ્ધ બળતણ રશિયન મૂળનું માનવામાં આવતું નથી. સમાચાર એજન્‍સી બ્‍લૂમબર્ગના અહેવાલ મુજબ, ડેટા ઇન્‍ટેલિજન્‍સ ફર્મ Kpler અનુસાર, ભારતે ગયા મહિને ન્‍યુયોર્કમાં લગભગ ૮૯,૦૦૦ બેરલ ગેસોલિન અને ડીઝલની દૈનિક શિપિંગ કરી હતી, જે લગભગ ચાર વર્ષમાં સૌથી વધુ છે. યુરોપમાં દૈનિક લો-સલ્‍ફર ડીઝલનો -વાહ જાન્‍યુઆરીમાં ૧૭૨,૦૦૦ બેરલ હતો, જે ઑક્‍ટોબર ૨૦૨૧ પછી સૌથી વધુ છે, બ્‍લૂમબર્ગે અહેવાલ આપ્‍યો છે.