Gujarati News

નવી દિલ્હી, તા.૮: RBIએ તેની નવી નાણાકીય નીતિ જાહેર કરી છે. એમપીસીએ તેની બેઠકમાં ફરી એકવાર તેના દરો વધારવાનો નિર્ણય લીધો છે. રેપો રેટમાં ૨૫ બેસિસ પોઈન્ટનો વધારો કરવામાં આવ્યો છે. RBI ગવર્નર શકિતકાંત દાસે આજે વધેલા દરોની જાહેરાત કરી હતી. રેપો રેટ વધતા લોન મોંઘી થશે અને હપ્તા વધશે. મે પછી રેપોરેટ ૨.૫૦ ટકા વધ્યા છે. મે પહેલા ૪% હતો રેપોરેટ

ડિસેમ્બર ૨૦૨૨ માં ભારતનો છૂટક ફુગાવો ઘટીને ૫.૭૨% થયો હતો, પરંતુ હજુ પણ આરબીઆઈના ઇચ્છિત સ્તરથી ઉપર છે. સરકારી ડેટા સૂચવે છે કે તાજેતરના આંકડાઓ અગાઉના મહિનાની સરખામણીએ છૂટક ફુગાવામાં નજીવો ઘટાડો અને વધુ મધ્યસ્થતા દર્શાવે છે.

આ વલણને ધ્યાનમાં રાખીને ફુગાવાને અંકુશમાં લેવા માટે વ્યાજદરમાં વધારો કરવાનો નિર્ણય લેવામાં આવ્યો છે. MPCએ સમીક્ષા બેઠકમાં રેપો રેટમાં વધારો કર્યો છે.

મોનેટરી પોલિસી કમિટીએ બેઠકમાં લિકિવડિટી એડજસ્ટમેન્ટ ફેસિલિટી (LAF) હેઠળ રેપો રેટમાં ૨૫ બેસિસ પોઈન્ટનો વધારો કરીને ૬.૫૦ ટકા કરવાનો નિર્ણય લીધો છે. આજનો વધારો છેલ્લા સાત મહિનામાં RBI દ્વારા વ્યાજદરમાં કરવામાં આવેલ છઠ્ઠો વધારો છે. સેન્ટ્રલ બેંકે મે મહિનામાં ૦.૪૦ ટકા, જૂન, ઓગસ્ટ અને સપ્ટેમ્બરમાં ૦.૫૦-૦.૫૦-૦.૫૦ ટકાના દરમાં વધારો કર્યો હતો. ડિસેમ્બરમાં દરોમાં ૦.૩૫ ટકાનો વધારો કરવામાં આવ્યો હતો. નવો રેપો રેટ દર હવે ૬.૨૫ ટકાથી વધીને ૬.૫૦ થયો છે.

રીઝર્વ બેંકના ગવર્નરે જણાવ્યુ હતુ કે ૨૦૨૩-૨૪માં ફુગાવાનો દર ૪% ઉપર રહેશે. તેમણે ૨૦૨૪ માટે વાસ્તવિક જીડીપીનો દર ૬.૪ રહેશે તેવુ અનુમાન વ્યકત કર્યુ હતુ.

તેમણે કહ્યું હતુ કે ૨૦૨૩માં ફુગાવો ૬.૫ ટકા રહેશે. ૨૦૨૪માં તે ૫.૩ ટકા રહેશે.