Gujarati News

સીડની :ફેલિક્સ એગ્યુર-આલિયાસિમ અને ડેનિસ શાપોવાલોવે આખરી અને નિર્ણાયક ડબલ્સ મેચમાં મેડ્વેડેવ અને સાફિઉલ્લીનને ૪-૬, ૭-૫, ૧૦-૭ થી હરાવીને કેનેડાને પહેલી વખત એટીપી કપની ફાઈનલમાં પ્રવેશ અપાવ્યો હતો. જ્યારે ડિફેન્ડિંગ ચેમ્પિયન રશિયાની ટીમ ૧-૨થી હારીને બહાર ફેંકાઈ હતી. હવે ફાઈનલમાં કેનેડાનો મુકાબલો બે વખતની ફાઈનલીસ્ટ સ્પેનની ટીમ સામે થશે.

ડેનિસ શાપોવાલોવે કેનેડાને વિજયી પ્રારંભ અપાવ્યો હતો. તેણે રશિયાના સાફિઉલ્લીનને ત્રણ સેટના સંઘર્ષમય મુકાબલામાં ૬-૪, ૫-૭, ૬-૪થી હરાવ્યો હતો. જ્યારે મેડ્વેડેવે ૬-૪, ૬-૦થી આલિયાસિમને હરાવતા રશિયાએ ૧-૧થી બરોબરી મેળવી લીધી હતી. હવે ત્રીજી અને નિર્ણાયક મેચ પર બધો મદાર હતો. જેમાં કેનેડિયન જોડીએ ભારે રોમાંચક મુકાબલામાં મેડ્વેડેવ-સાફિઉલ્લીનને મહાત કરી હતી. આ મુકાબલો એક કલાક અને ૩૭ મિનિટ સુધી ચાલ્યો હતો.

અગાઉ સ્પેને ૨-૧થી પોલેન્ડને પરાજીત કર્યું હતુ. એટીપી કપ આ ત્રીજા વર્ષે રમાઈ રહ્યો છે. અગાઉ ૨૦૨૦મા રમાયેલી પ્રથમ સિઝનમાં સર્બિયાની ટીમે૨-૧થી સ્પેનને હરાવ્યું હતુ. જ્યારે ગત સિઝનમાં રશિયાની ટીમે ૨-૦થી ઈટાલીને પરાજીત કર્યું હતુ.