Gujarati News

Gujarati News

News of Thursday, 6th December 2018

ભાજપનો નવો વ્યુહઃ મોદી-રાહુલની સરખામણી આધારિત જ પ્રચાર

અન્ય મુદ્દાઓ નહિ જામતા હવે બે મુખ્ય પ્રતિસ્પર્ધીઓના વ્યકિતને જ ચૂંટણીનો મુદ્દો બનાવવાનો પ્રયાસઃ લોકસભાની ચૂંટણી વખતે લોકો વડાપ્રધાન પદ માટે બંન્નેની તુલના કરે તો પહેલી પસંદ મોદી જ બને તેવી ભાજપની ધારણા

રાજકોટ તા.૬: લોકસભાની ચૂંટણીમાં અન્ય કોઇ મુદ્દા ચાલે કે ન ચાલે ભાજપે વડાપ્રધાન શ્રી નરેન્દ્રભાઇ મોદી અને વડાપ્રધાન પદના ઉમેદવાર ગણાતા કોંગ્રેસ પ્રમુખ રાહુલ ગાંધીના વ્યકિતત્વને જ પ્રચારનો મુદ્દો બનાવવાની દિશા પકડયાનું ભાજપના ટોચના વર્તુળો જણાવે છે. દેશના મતદારો બંન્નેની પ્રતિભાની સરખામણી કરે તો તેમાં પહેલી પસંદ મોદી જ બને તેવી આશા સાથે ભાજપે દેશવ્યાપી પ્રચાર અભિયાનો ચલાવવાની તૈયારી શરૂ કરી દીધી છે. ખુદ મોદી પણ છેલ્લા કેટલાક સમયથી 'નામદાર સામે કામદાર' જેવા શબ્દ પ્રયોગ કરી આગામી સમયના ભાજપા પ્રચારના એંધાણ આપી રહયા છે.

ભાજપે વિકાસ, રામ મંદિર, રાષ્ટ્રવાદ વગેરે મુદ્દા ઉપસાવવા પ્રયાસ કર્યા છે પણ તેને અપેક્ષા મુજબ જન-પ્રતિસાદ મળતો નથી તેથી હવે વડાપ્રધાન પદ માટે કોણ યોગ્ય? તેવા મતલબના સવાલ સાથે મોદી-ગાંધીની સરખામણી કરવામાં આવશે.

ભાજપ માટે ૨૦૧૪ કરતા અત્યારે પરિસ્થિતિ જુદી છે. તે વખતે વચનો આપવાના હતા હવે કામગીરીનો હિસાબ આપવાનો છે. સરકાર સામે જેે લોકો નારાજ છે તેની નારાજગી દૂર કરીને ભાજપ તરફી જુવાળ સર્જવા માટે નવો મુદ્દો જરૂરી છે. ચૂંટણી સુધીમાં અન્ય કોઇ પ્રભાવક મુદ્દા ન મળે તો મોદી-રાહુલની સરખામણીનો મુદ્દો હાથવગો રાખવાની ભાજપે તૈયારી કરી છે. રાહુલના જુદા-જુદા સમયના પ્રવચનો, નિવેદનો વગેરેના આધારે પ્રચારનો મસાલો ભાજપ તૈયાર કરશે. મોદીને પ્રભાવશાળી નેતા તરીકે ઉપસાવવાનો અને રાહુલને અપરિપકવ નેતા તરીકે ચીતરવાનો ભાજપનો ઇરાદો જણાય છે.

જો કોંગ્રેસ સહિતના વિપક્ષો ભાજપ સામે મહાગઠબંધન કરી રાહુલ સિવાઇ અન્ય કોઇને વડાપ્રધાન પદના ઉમેદવાર તરીકે આગળ કરે તો ભાજપે રાહુલને નિશાન બનાવીને કરવા ધારેલા પ્રચારનું સૂરસૂરીયું થઇ જશે પરંતુ હાલ એવી શકયતા નહિવત છે.(૧.૧૪)

 

(3:57 pm IST)
  • વડોદરા :સ્કૂલ કમ્પાઉન્ડમાં સ્કૂલવાનમાં આગ :સ્કૂલવાનમાંથી વિદ્યાર્થીઓને ઉતારી લેવાયા :સદનસીબે કોઈ અનિચ્છનીય ઘટના ન બની :પાદરા ફાયરવિભાગે આગ પર કાબૂ મેળવ્યો :પાદરાની ડી.ડી. પટેલ શારદા હાઈસ્કૂલની ઘટના access_time 3:30 pm IST

  • સ્મૃતિ ઇરાનીનો મજાકિયો અંદાજ : ભગવાન મને ઉઠાવી લે : મને નહી મારા વજનને : સ્મૃતિ ઇરાનીની ઇન્સ્ટાગ્રામ એકાઉન્ટમાં તસ્વીર શેયરઃ તસ્વીરમાં પતિ જુબીન ઇરાની પણ સામેલ : પતિ જુબિન ઇરાનીએ મજાકમાં કહ્યુ આને પણ ઉઠાવી લ્યો : પતિ જુબીન ઇરાની પોસ્ટ પર કોમેન્ટ કરી : તે કયારેય ઇચ્છતા નથી એને ઉઠાવી લે : જીંદગીના ચઢાવ ઉતાર છેઃ કોઇ મને પૂછે, એમણે આગળ લખ્યુ મારા બાળકોની મા તમે બેહતરીન છોઃ સ્મૃતિ ઇરાનીએ આભાર માન્યો access_time 12:02 am IST

  • પીટર મુખર્જીની જામીન અરજીનો સીબીઆઈએ કર્યો વિરોધ :તેની સામે પર્યાપ્ત પુરાવા :મુખરજીએ દાખલ કરેલી અરજીમાં પોતે ગુન્હામાં સામેલ હોવાનો ઇન્કાર કર્યો હતો :સીબીઆઈએ જામીન અરજી અંગે કહ્યું કે પીટર ,શીના બોરનું અપહરણ અને હત્યાના જધન્ય અપરાધમાં સામેલ હતા અને તેની વિરુદ્ધ આરોપ સાબિત કરવા પૂરતા પુરાવા છે access_time 1:02 am IST