Gujarati News

Gujarati News

News of Thursday, 6th December 2018

પેપરલીકનો માસ્ટર માઇન્ડ યશપાલ મધરાતે ઝડપાયો

બે દિવસથી તે ભુખ્યો હતો, પેપરલીક થયાનો ભાંડો ફુટી જવાની જાણ થતાં મહિસાગર પહોંચેલઃ પેપરલીક પાછળ મોટામાથાઓનો હાથ હોવાનો યશપાલે સસરા સમક્ષ રહસ્યસ્ફોટ કર્યોઃ અર્ધનિંદ્રા હાલતમાં તેના જ મિત્રની માહિતી પરથી મહિસાગરના વિરપુર ગામના લીંબડીયા રોડ ઉપરથી પોલીસે ઝડપી લીધોઃ ક્રાઇમ બ્રાંચ, એટીએસ અને મુખ્યમંત્રી કાર્યાલય સુધી ભારે ધમધમાટ

રાજકોટ તા.૬:  પોલીસની લોકરક્ષક દળની ભરતી પરીક્ષાનું પેપરલીક થયા બાદ સરકારની આબરૂના લીરા ઉડાડતી આ ઘટનામાં પોલીસે એક મહિલા, ભાજપના બે કાર્યકરો અને એક પી.એસ.આઇ.ની ધરપકડ કર્યા બાદ પેપર લીક પ્રકરણના માસ્ટર માઇન્ડ ગણાતા યશપાલ સોલંકીને આજે વ્હેલી સવારે મહિસાગર પોલીસે અર્ધનિંદ્રા જેવી હાલતમાં વિરપુર ગામે લીંબડીયા રોડ ઉપરથી ઝડપી લઇ ક્રાઇમબ્રાંચ અને એટીએસના હવાલે કરી દીધો છે.

ઉચ્ચ પોલીસ સુત્રોમાંથી મળતી વિગતો મુજબ પેપરલીકની ૅઘટનામાં યશપાલ પણ સુરત ખાતે પરીક્ષા આપતો હોવાથી તેને પેપર રદ્દ થયાની જાણ થતાં જ પોતે હવે સકંજામાં આવી જશે તેવું વિચારી ખૂબ ગભરાઇ જઇ સુરતથી વડોદરા પહોંચ્યા બાદ મહિસાગર જિલ્લા તરફ નિકળી વિરપુર પહોંચ્યો હતો.

તેની પાસેના રૂપિયા પણ ખૂટી ગયા હતા. બે દિવસથી તે ભુખ્યો હતો. આમ તેમ ભટકતો હતો. દરમિયાન તેનાં એક મિત્રની નજર તેના પર પડી જતાં તેણે મહિસાગર પોલીસને જાણ કરતાં પોલીસ ટીમે તેને તાકીદે ઝડપી લીધો હતો.

યશપાલ સોલંકી અને યશપાલ ઠાકોર એવી ભળતી વ્યકિતઓના કારણે વડોદરામાં જે રીતે ઓળખ કરવામાં ભુલ થઇ હતી તેવી ભુલ ન થાય તે માટે યશપાલની ઓળખ કરાવવા માટે પોલીસે તેના સસરાને પોલીસ મથકે બોલાવ્યા હતાં. આ જ યશપાલ હોવાની ખરાઇ કરી હતી. ત્યારબાદ ગાંધીનગર સેકટર-૭ પોલીસ, અમદાવાદ ક્રાઇમ બ્રાંચ, એ.ટી.એસ. અને ડી. જી. પી.ના ફોન સતત રણકવા લાગ્યા હતાં.

બિનસત્તાવાર રીતે એક એવી હકિકત જાણવા મળે છે કે બે મીનીટ માટે પોતાના જમાઇ યશપાલ સોલંકીને મળેલા સસરાએ એવો ચોંકાવનારો ખુલાસો કર્યો હતો કે તેમના જમાઇ ખૂબ ગભરાયેલા હતા અને ડરતા - ડરતા તેના જમાઇએ એવું પણ જણાવેલ કે આ સમગ્ર પ્રકરણમાં મોટા માથાઓની સંડોવણી છે.

પેપરલીક કર્યા બાદ યશપાલ દિલ્હીથી આન્સર કી લઇ પ્લેનમાં વડોદરા ગયો હતો અને વડોદરાથી તે બાય રોડ સુરત ગયો હતો. અને સુરતમાં પેપર ફુટવાની ઘટનાની જાણ થઇ જતાં તે ખૂબ ગભરાઇ ગયો હતો અને નાસી છૂટયો હતો.

અત્રે યાદ રહે કે યશપાલ સોલંકી વડોદરા મ્યુનિસીપલ કોર્પોરેશનમાં ફરજ બજાવી રહ્યો હોવાનું ખુલતા વડોદરાના પોલીસ કમિશ્નર શ્રી અનુપમસિંહ ગેહલોતે ક્રાઇમબ્રાંચની વિવિધ ટીમો બનાવી તેના નિવાસ સ્થાન અંગે તપાસ કરાવી હતી. અનુપમસિંહ ગેહલોતની તપાસમાં જ સર્વપ્રથમ યશપાલ મહિસાગર જિલ્લામાં ભાગી છુટયો હોવાની વિગતો શોધી કાઢી હતી.

યશપાલની ધરપકડ બાદ હવે બધાને દિલ્હી લઇ જનાર તમામના ફોન બંધ કરાવનાર નિલેશનું રહસ્ય ખુલવા સાથે 'ટાટ'ની પરીક્ષામાં ગરબડ કરનાર અને લોકરક્ષક પેપર ફોડનાર આંતરરાજય ગેંગ એક છે કે કેમ? આંતરરાજય ગેંગે કોની પાસેથી પેપર મેળવેલ તેવા અનેક સવાલોના જવાબ પોલીસને મળે તેવી લોકો આશા સેવી રહયાં છે.(૧.૩)

(9:59 am IST)
  • મોરબીના રવાપર ધૂનડા રોડ પર નવા બની રહેલાં બિલ્ડીંગમાં લિફ્ટના ખાચામાં યુવકનો મૃતદેહ મળી આવતા ચકચાર મચી છેપ્રાથમિક તપાસમાં પોલીસને મૃતક યુવાન પરપ્રાંતિય હોવાનું જાણવા મળ્યું છેપોલીસે સમગ્ર બનાવ ની ગંભીરતાપૂર્વક નોંધ લઈ યુવાન ના મોત અંગેનું કારણ અને પરિવારની શોધખોળ હાથ ધરી છે access_time 3:56 pm IST

  • ગીરસોમનાથ :તાલાલાના બોરવાવ ગામે પીતાની નજર સામે 8 વર્ષના પૂત્ર પર દિપડાએ કર્યો હુમલો:પિતાએ દીપડાનો પીછો કરતા ઇજાગ્રસ્ત પૂત્રને છોડી દીપડો નાસી છુટ્યો :વનવીભાગે બે પીંજરા મૂકતા હુમલાખોર દીપડો ઝડપાયો access_time 3:30 pm IST

  • સ્મૃતિ ઇરાનીનો મજાકિયો અંદાજ : ભગવાન મને ઉઠાવી લે : મને નહી મારા વજનને : સ્મૃતિ ઇરાનીની ઇન્સ્ટાગ્રામ એકાઉન્ટમાં તસ્વીર શેયરઃ તસ્વીરમાં પતિ જુબીન ઇરાની પણ સામેલ : પતિ જુબિન ઇરાનીએ મજાકમાં કહ્યુ આને પણ ઉઠાવી લ્યો : પતિ જુબીન ઇરાની પોસ્ટ પર કોમેન્ટ કરી : તે કયારેય ઇચ્છતા નથી એને ઉઠાવી લે : જીંદગીના ચઢાવ ઉતાર છેઃ કોઇ મને પૂછે, એમણે આગળ લખ્યુ મારા બાળકોની મા તમે બેહતરીન છોઃ સ્મૃતિ ઇરાનીએ આભાર માન્યો access_time 12:02 am IST