નવા સબસ્‍ક્રાઇબર્સને વેરીફાઇ કરવા વૈકલ્પિક ડિઝીટલ પ્રક્રિયાના અમલની સમયમર્યાદા લંબાવવાની વિનંતી ફગાવી દેવાઇ

News of Wednesday, 7th November 2018

નવા સબસ્‍ક્રાઇબર્સને વેરીફાઇ કરવા વૈકલ્પિક ડિઝીટલ પ્રક્રિયાના અમલની સમયમર્યાદા લંબાવવાની વિનંતી ફગાવી દેવાઇ

કોલકાતા:નવા સબસ્ક્રાઇબર્સને વેરિફાય કરવા વૈકલ્પિક ડિજિટલ પ્રક્રિયાનો અમલ કરવા 5 નવેમ્બરની સમયમર્યાદા લંબાવવાની ટેલિકોમ કંપનીઓની વિનંતીને ટેલિકોમ વિભાગ (DOT)એ ફગાવી દીધી છે. જોકે વોડાફોન ઇન્ડિયા, ભારતી એરટેલ અને રિલાયન્સ જીઓએ કેટલાંક સર્કલ્સમાં નવી ઓથેન્ટિકેશન સિસ્ટમનો ઉપયોગ શરૂ કરી દીધો છે. ટેલિકોમ કંપનીઓના અધિકારીઓના જણાવ્યા પ્રમાણે વૈકલ્પિક સિસ્ટમ શરૂ થઈ રહી છે ત્યારે તેઓ આધાર આધારિત E-KYCની જૂની પ્રક્રિયા પણ ચાલુ રાખી રહ્યા છે. વૈકલ્પિક ડિજિટલ પ્રક્રિયામાં કસ્ટમર એક્વિઝિશન ફોર્મ (CAF)ને સબસ્ક્રાઇબર્સના લાઇવ ફોટોગ્રાફ્સ અને એડ્રેસ તથા આઇડેન્ટિટી પ્રૂફની સ્કેન્ડ ઇમેજ સાથે જોડવાની દરખાસ્ત છે. આમ, આ પ્રક્રિયા સંપૂર્ણ પેપરલેસ રહેશે. DOTના અધિકારીએ જણાવ્યું હતું કે, “એક્સ્ટેન્શન આપનાર અમે કોઈ નથી. જો ટેલિકોમ કંપનીઓને એક્સ્ટેન્શન જોઈતું હોય તો તે UIDAI (યુનિક આઇડેન્ટિફિકેશન ઓથોરિટી ઓફ ઇન્ડિયા) તરફથી આવશે. અમે તો માત્ર સુપ્રીમ કોર્ટના આદેશનું પાલન જ કરીએ છીએ.” ટેલિકોમ વિભાગ બુધવારે બેઠક યોજીને આ મુદ્દે ચર્ચા કરે તેવી સંભાવના છે. ટેલિકોમ કંપનીઓએ જણાવ્યું હતું કે, સર્વિસ પ્રોવાઇડર્સ પાંચ નવેમ્બર સુધીમાં નવી ડિજિટલ પ્રોસેસનો ‘પ્રૂફ ઓફ કન્સેપ્ટ’ રજૂ કરી દેશે, પણ ત્યાં સુધી આધાર આધારિત E-KYCને અટકાવવી શક્ય નથી. કારણ કે ઓપરેટરોએ લાખો રિટેલ સ્ટોર્સ સુધી સંદેશાવ્યવહાર કરવાનો છે, જેમાંના અનેક સ્ટોર્સ દેશના અંતરિયાળ વિસ્તારોમાં છે.