Gujarati News

મુંબઈ, તા.૭ : કુરલા નાળામાં મૃતદેહ મળી આવ્યાના ૪૮ જ કલાક પછી નહેરુ નગર પોલીસે આરોપીની શોધ કરી લીધી છે. પોલીસે આ મર્ડર કેસમાં બે મહિલાઓની અટકાયત કરી છે. મહિલાઓને હત્યામાં સાથ આપનાર યુવકની પણ પોલીસ દ્વારા અટકાયત કરવામાં આવી છે. જ્યારે પોલીસ દ્વારા પૂછપરછ કરવામાં આવી તો મુખ્ય આરોપીએ જણાવ્યું , મૃતદેહ ૧૬ વર્ષીય તરુણીનો હતો જેના તેના પતિ સાથે સંબંધો હતા. તેણીએ પોતાની અન્ય એક મિત્રની મદદથી તરુણીની હત્યા કરી હતી.

પોલીસ દ્વારા પ્રાપ્ત જાણકારી અનુસાર, મૃતક તે જ છોકરી છે જેણે છ મહિના પહેલા ૫૧ વર્ષીય વ્યક્તિ વિરુદ્ધ શારીરિક શોષણની ફરિયાદ નોંધાવી હતી. તેની ફરિયાદના આધારે પોલીસે આરોપીની ધરપકડ પણ કરી હતી. પોક્સોએક્ટ અંતર્ગત પોલીસે કાર્યવાહી કરી હતી. અને હવે તે જ તરુણીનો મૃતદેહ મળી આવ્યો હતો.

વિસ્તારપૂર્વક વાત કરવામાં આવે તો, મંગળવારના રોજ નહેરુ નગર પોલીસને કુરલા વિસ્તારમાં આવેલા બંટર ભવન નજીક એક નાળામાં બેગ તરતી દેખાઈ હતી. તેમણે જ્યારે બેગ ખોલીને જોયું તો તેમાં મૃતદેહ હતો જેના હાથ અને પગ બાંધી દેવામાં આવ્યા હતા. પોલીસે અજાણી વ્યક્તિ વિરુદ્ધ ફરિયાદ દાખલ કરીને હત્યાના આ કેસની તપાસ શરુ કરી હતી. પોલીસ સૂત્રોના જણાવ્યા અનુસાર, તેમણે ચેમ્બુર, તિલક નગર, મહુલ ગામ સહિત નાળું જ્યાંથી પસાર થતુ હતું તે આખા પટ્ટાને ટ્રેસ કર્યો હતો.

એક પોલીસકર્મીએ જણાવ્યું કે, સીસીટીવી ફૂટેજની મદદથી પોલીસને જાણવા મળ્યું કે એક રિક્ષા નાળા નજીક ઉભી રહી અને કોઈએ ઉતરીને નાળામાં કંઈક નાખ્યું. પરંતુ ફૂટેજ ઘણી બ્લર હતી. પોલીસ ટીમે ઝૂમ કરીને રિક્ષાનો નંબર જોયો અને તેના આધારે ડ્રાઈવરને પકડવામાં આવ્યો.

ડ્રાઈવરને જ્યારે પૂછપરછ કરવામાં આવી તો તેણે સમગ્ર હકીકત જણાવી દીધી હતી.

પોલીસ અધિકારીના જણાવ્યા અનુસાર રિક્ષા ડ્રાઈવરની મદદથી કેસ સોલ્વ કરવામાં મદદ મળી છે. જે વિસ્તારમાં બન્ને મહિલાઓએ રિક્ષા રોકી હતી તે વિસ્તારમાં ડ્રાઈવર લઈ ગયો. ડ્રાઈવર તરફથી આપવામાં આવેલી માહિતીના આધારે પોલીસે એક મહિલાની અટકાયત કરી અને પૂછપરછમાં તેણે અન્ય મહિલાનો પણ ઉલ્લેખ કર્યો. શરુઆતમાં બન્ને મહિલાઓએ પોતાની સંડોવણી હોવાની વાત ફગાવી હતી, પરંતુ જ્યારે અલગ અલગ પૂછપરછ કરવામાં આવી તો સત્ય સામે આવ્યુ હતું.

મુખ્ય આરોપીએ જણાવ્યું કે, મૃતક ૧૬ વર્ષીય એક છોકરી હતી જે કુરેશ નગરની એક ચાલીમાં રહેતી હતી. આરોપીનો દાવો છે કે મૃતક તેના પતિ સાથે શારીરિક સંબંધ ધરાવતી હતી. એક વરિષ્ઠ પોલીસ અધિકારીએ જણાવ્યું કે, મહિલાને ગુસ્સો આવ્યો અને તેણે આ ષડયંત્ર રચ્યુ હતું. તેણે કિશોરીને માહુલ ગામમાં એક જગ્યાએ બોલાવી અને પછી ગળુ દબાવીને તેની હત્યા કરવામાં આવી. આ માટે મુખ્ય આરોપીએ પોતાની એક મિત્રની મદદ લીધી હતી. તેના હાથ અને પગ પણ બાંધી દેવામાં આવ્યા હતા. મુખ્ય આરોપીને સમગ્ર ષડયંત્રમાં મદદ કરનાર અન્ય ૩ લોકોની હજી પોલીસને શોધ છે. ઈન્સપેક્ટર ચંદ્રશેખર ભાબલે આ વાતની પૃષ્ટિ કરી અને જણાવ્યું કે પૂરાવા નષ્ટ કરવાની કલમ પણ આ લોકો વિરુદ્ધ લગાવવામાં આવશે.