Gujarati News

નવી દિલ્હી/મુંબઈ:કોમ્પ્લાન બનાવતી ક્રાફ્ટ હેઇન્ઝનો ભારત ખાતેનો બિઝનેસ ખરીદવા હવે માત્ર બે કંપની કોકા-કોલા અને કેડિલા વચ્ચે સ્પર્ધા થશે. સૂત્રોના જણાવ્યા અનુસાર બંને કંપની આગામી સમયમાં બંધનકર્તા બિડ સુપરત કરશે. ક્રાફ્ટ હેઇન્ઝે ઓગસ્ટમાં બીજા રાઉન્ડની વાટાઘાટ માટે કેટલાક બિડર્સ પસંદ કર્યા હતા.

જેમાં કોકા-કોલા અને ઝાયડસ કેડિલા ઉપરાંત, ટાટા જૂથ, વિપ્રો કન્ઝ્યુ., ડાબર ઇન્ડિયા અને ડેનોન સામેલ હતા. જોકે, બિનઆકર્ષક પ્રોડક્ટ પોર્ટફોલિયો, કોમ્પ્લાનની અનિશ્ચિત વૃદ્ધિ અને નિયમન સંબંધી અવરોધોને કારણે મોટા ભાગની કંપનીઓએ બિડ નહીં કરવાનો નિર્ણય લીધો છે.

નેસ્લે, ઇમામી અને ITC પણ અગાઉ ક્રાફ્ટ હેઇન્ઝનો પ્રોડક્ટ પોર્ટફોલિયો ખરીદવાની દોડમાં હતા. જોકે, તેમને પછીના રાઉન્ડમાં પસંદ કરાયા ન હતા અથવા પ્રારંભિક ચર્ચા પછી કંપની બિડિંગ પ્રક્રિયામાંથી ખસી ગઈ હતી. ક્રાફ્ટ હેઇન્ઝને એસેટ્સ માટે લગભગ એક અબજ ડોલર મળવાનો અંદાજ છે અને તેણે સોદાની જવાબદારી ઇન્વેસ્ટમેન્ટ બેન્ક જે પી મોર્ગનને સોંપી છે.

જોકે, સૂત્રોના જણાવ્યા અનુસાર ગ્રાહકોની બદલાતી પસંદગી અને સ્વાદના કારણે કંપનીઓ કોમ્પ્લાન અને નાયસિલ જેવી બ્રાન્ડ્સ માટે ઊંચું વેલ્યુએશન આપવા તૈયાર નથી. ક્રાફ્ટ હેઇન્ઝના ભારત ખાતેના બિઝનેસ માટે 55-60 કરોડ ડોલરની રેન્જમાં બિડ મળવાનો અંદાજ છે.

કોકા-કોલા કે ઝાયડસ કેડિલાએ આ મુદ્દે મોકલાયેલા ઇ-મેઇલનો જવાબ આપ્યો ન હતો. સૂત્રોના જણાવ્યા અનુસાર બંને કંપનીમાંથી કોકા-કોલા વધુ આક્રમક રહેવાનો અંદાજ છે. ગયા સપ્તાહે તેણે સ્ટારબક્સ, નેસ્લે અને JAB હોલ્ડિંગ્સ સામે સ્પર્ધા માટે પાંચ અબજ ડોલરમાં કોસ્ટા કોફી ચેઇનની ખરીદી હતી. કોકા-કોલા ભારતમાં ગ્લેક્સોસ્મિથક્લાઇનના કન્ઝ્યુ. ન્યુટ્રિશન બિઝનેસને ખરીદવા પણ સક્રિય છે. હોર્લિક્સ બ્રાન્ડ માટે જાણીતી ગ્લેક્સો કન્ઝ્યુ.નો સોદો ચાર અબજ ડોલરમાં થવાનો અંદાજ છે. સોદો સફળ થશે તો ’૯૦ના દાયકામાં થમ્સ અપ સહિત પારલેની બેવરેજ બ્રાન્ડ્સના એક્વિઝિશન પછી કોકા-કોલાની આ બીજી મોટી ખરીદી હશે.

કોકા-કોલાની યોજનાથી વાકેફ એક્ઝિક્યુટિવે જણાવ્યું હતું કે, “ભારતમાં સોફ્ટ ડ્રિંકના કોર બિઝનેસનું વેચાણ ‘ઠંડું’ છે. તેને લીધે કંપની નોન-સોડા બેવરેજ સેગમેન્ટમાં જાણીતી અથવા વૃદ્ધિની વિપુલ શક્યતા ધરાવતી બ્રાન્ડ્સ ખરીદવા માંગે છે.” ગ્લુકોઝ અને દૂધ આધારિત પીણાંમાં એન્ટ્રી કોકા-કોલાને નવી ડિસ્ટ્રિબ્યુશન ચેનલ્સમાં વૃદ્ધિની તક આપશે.

અમદાવાદની ઝાયડસ વેલનેસ માટે ક્રાફ્ટ હેઇન્ઝનો બિઝનેસ કંપનીની પર્સનલ અને સ્કિન કેર, શુગર સબસ્ટિટ્યુટ અને હેલ્થ ફૂડ્ઝ પ્રોડક્ટ્સમાં ઉમેરો કરશે. ઝાયડસ કેડિલા ગ્રૂપની કુલ આવકમાં ઝાયડસ વેલનેસનો હિસ્સો 4 ટકા છે અને 2017-’18માં તેમાં 7 ટકા વધારો નોંધાયો હતો.

વિશ્લેષકોના જણાવ્યા અનુસાર GSTના અમલ સહિતનાં પડકારો છતાં ઝાયડસ વેલનેસની મુખ્ય પ્રોડક્ટ્સ શુગર ફ્રી, એવરયુથ અને ન્યુટ્રાલાઇટે ઝડપી વૃદ્ધિ દર્શાવી હતી. એડલવાઇઝ સિક્યોરિટીઝના એનાલિસ્ટ દીપક મલિકે જણાવ્યું હતું કે, “કૃત્રિમ સ્વીટનર કેટેગરીમાં શુગર ફ્રીએ 94.2 ટકા બજારહિસ્સા સાથે ટોચનું સ્થાન જાળવી રાખ્યું છે. જોકે, વાર્ષિક ધોરણે તેના માર્કેટ શેરમાં 0.3 ટકા ઘટાડો નોંધાયો હતો.”