Gujarati News

નવી દિલ્લી તા.07 : બાંગલાદેશમાં પેટ્રોલના ભાવમાં 50% થી વધુનાં જંગી ભાવ વધારાથી લોકો હેરાન પરેશાન થઈ ગયા છે. શું થયું તે જાણીને લોકો આશ્ચર્યચકિત છે. શ્રીલંકામાં લોકો ભયભીત છે. ઘણી જગ્યાએ વિરોધ પ્રદર્શન શરૂ થઈ ગયા છે, જેની સામે પોલીસે કાર્યવાહી કરવી પડી છે. ઢાકા ટ્રિબ્યુનના એક અહેવાલમાં જણાવવામાં આવ્યું છે કે સરકારે પેટ્રોલના ભાવમાં વધારો કરતાની સાથે જ પેટ્રોલ પંપની બહાર લોકોની લાંબી લાઈનો જોવા મળી હતી. 

શ્રીલંકા બાદ હવે બાંગ્લાદેશ આર્થિક સંકટના સૌથી ખરાબ તબક્કામાંથી પસાર થઈ રહ્યું છે. મોંઘવારીના કારણે લોકો રસ્તા પર ઉતરી આવ્યા છે. દેશના અનેક શહેરોમાં દેખાવો ચાલી રહ્યા છે. રોષે ભરાયેલા લોકોએ પોલીસના વાહનને નુકસાન પહોંચાડ્યું હતું.

બાંગ્લાદેશની વર્તમાન પરિસ્થિતિથી સ્પષ્ટ છે કે પરિસ્થિતિ વધુ વણસી શકે છે. બાંગ્લાદેશના નાણામંત્રીએ આંતરરાષ્ટ્રીય મુદ્રા કોષ પાસેથી 4.5 બિલિયન ડોલરની લોન માંગી છે. આર્થિક સંકટનો સામનો કરી રહેલા બાંગ્લાદેશમાં અન્ય દેશોમાંથી આયાત કરવામાં આવતા તેલનો પુરવઠો ખોરવાઈ ગયો છે. પરિણામે ડીઝલથી ચાલતા પાવર પ્લાન્ટ પર તાળા લાગી ગયા છે.
દેશની સેન્ટ્રલ બેંકની તિજોરી એટલી હદે ઘટી ગઈ છે કે ઘણી વસ્તુઓની આયાત પર પ્રતિબંધ લગાવી દેવામાં આવ્યો છે. બાંગ્લાદેશમાં પેટ્રોલના ભાવમાં 51 ટકા અને ડીઝલના ભાવમાં 42 ટકાનો વધારો થયો છે. રશિયા-યુક્રેન અને ઓપેક દેશોએ કોરોના રોગચાળાને કારણે તેલનો પુરવઠો ઘટાડ્યો તેના કારણે માંગ-પુરવઠાનું સમીકરણ બગડ્યું. જેના કારણે સમગ્ર વિશ્વમાં સપ્લાય પર અસર જોવા મળી રહી છે.