Gujarati News

Gujarati News

News of Thursday, 7th June 2018

આલેલે... આટલી ગરમી છતાં ACનું વેચાણ ઘટયું

છેલ્લા ત્રણ વર્ષમાં તેનું સૌથી ખરાબ વેચાણ થયું છે

કોલકાતા તા. ૭ : સત્તાવાર રીતે કહી શકાય કે, કમોસમી વરસાદને કારણે આ ઉનાળામાં કૂલિંગ એપ્લાયન્સિસ (એસી અને ફ્રીઝ)ના વેચાણ પર અસર પડી છે. એસીના વેચાણ પર ગંભીર અસર પડી હોવાથી છેલ્લાં ત્રણ વર્ષમાં તેનું સૌથી ખરાબ વેચાણ થયું છે એવી માહિતી માર્કેટ રિસર્ચ કંપની GfK દ્વારા પ્રકાશિત કરવામાં આવેલા તાજા ડેટા પરથી મળે છે.

GfKના ડેટા મુજબ, ૨૦૧૭ના એપ્રિલની સરખામણીએ ૨૦૧૮ના એપ્રિલમાં એસીના વેચાણમાં વિક્રમ ૧૯ ટકાનો ઘટાડો થયો હતો જયારે માર્ચમાં તેનું વેચાણ બે ટકા ઘટ્યું હતું. ઉદ્યોગજગતના અંદાજ પ્રમાણે, છેલ્લાં બે સપ્તાહમાં ઉત્તરનાં રાજયોમાં અસહ્ય ગરમી પડી હોવા છતાં મે મહિનામાં એસીનું વેચાણ વધુ ૧૨થી ૧૪ ટકા ઘટ્યું હતું. GfKના અહેવાલ મુજબ, ફ્રીઝનું વેચાણ (યુનિટ સેલ્સમાં) ગયા વર્ષની સરખામણીએ માર્ચ અને એપ્રિલમાં ૩ ટકા ઘટ્યું હતું.

ઉદ્યોગજગતના એકિઝકયુટિવ્સ જણાવે છે કે, ફ્રીઝના વેચાણ પર પ્રમાણમાં ઓછી અસર પડી હતી કારણ કે, તાપમાનનો પારો ૩૫ ડિગ્રી સેલ્શિયસને વટાવી દે એટલે ખાવાનું બગડી જતું હોવાથી ફ્રીઝના ખરીદનારા મળી રહે છે.

ઉનાળામાં ફ્રીઝ ખરીદનારામાં મુખ્યત્વે ફર્સ્ટ-ટાઇમ ખરીદદાર હોય છે. આનાથી વિપરીત રાત્રિનું તાપમાન ૩૦ ડિગ્રી કરતાં વધે ત્યારે એસીના વેચાણમાં તેજી આવતી હોય છે કારણ કે, રાત્રે આટલા તાપમાનમાં ઊંઘ આવવી મુશ્કેલ બની જાય છે. પરંતુ આ વર્ષે પશ્ચિમના વિસ્તારોને બાદ કરતાં આવી ગરમ રાતની સંખ્યા ઓછી હતી કારણ કે અવારનવાર વરસાદ પડી ગયો હતો.

ગોદરેજ એપ્લાયન્સિસના બિઝનેસ હેડ કમલ નંદીએ કહ્યું હતું કે, ઉત્તરનાં રાજયોમાં ગરમી વધી છે પરંતુ ગયા વર્ષે એસીની જે માંગ હતી તેના કરતાં વધારે માંગ ઊભી કરવા માટે આટલી ગરમી પૂરતી નથી. ઉપરાંત, ૧૫મી જૂને ચોમાસુ બેસે ત્યાં સુધીના પખવાડિયામાં પણ વેચાણમાં વધુ ૧૦થી ૧૫ ટકાનો ઘટાડો થવાની શકયતા છે કારણ કે, ગયા વર્ષે પ્રિ-GST પહેલાં જબરજસ્ત વેચાણ થઈ ગયું હતું. 'આ વખતે ચોમાસુ સામાન્ય રહેવાની આગાહી છે એટલે હવે ઓણમ અને અન્ય તહેવારોમાં વેચાણ વધવાની આશા છે.' એમ નંદીએ ઉમેર્યું હતું.

આ વર્ષે દક્ષિણ અને પૂર્વમાં વેચાણ તો સંપૂર્ણપણે ધોવાઈ ગયું છે. GDPના આંકડા મજબૂત છે અને માંગ પણ સારી હોવાથી તહેવારોમાં વેચાણ વધવાની અમને આશા છે. એમ બ્લૂ સ્ટારના જોઇન્ટ MD બી થિયાગરાજને કહ્યું હતું.

પૂર્વ ભારતમાં અગ્રસ્થાન ધરાવતી રિટેલર ગ્રેટ ઈસ્ટર્ન રિટેલના ડિરેકટર પુલકિત બૈદે કહ્યું હતું કે, એસીનું વેચાણ હવે માત્ર ઉનાળા પૂરતું સીમિત નથી પરંતુ સમગ્ર વર્ષમાં થોડું થોડું વેચાણ થતું જ રહે છે અને ૨૦૧૮માં આ ચિત્ર વધુ સ્પષ્ટ બનશે.

એસી માર્કેટની નં ૧ કંપની વોલ્ટાસના CEO પ્રદીપ બક્ષીએ કહ્યું હતું કે, કમોસમી વરસાદને કારણે એપ્રિલમાં વેચાણ પર અસર પડી હતી પરંતુ મેના બીજા પખવાડિયામાં દેશભરમાં ગરમી વધી હોવાથી વેચાણને વેગ મળ્યો હતો. જોકે, વોલ્ટાસે માર્ચથી મે મહિના દરમિયાન માત્ર એક આંકડામાં વૃદ્ઘિ નોંધાવી છે.(૨૧.૬)

(10:14 am IST)
  • આવતા ૭૨ કલાકમાં દક્ષિણ સૌરાષ્ટ્ર અને દક્ષિણ ગુજરાતમાં વરસાદની આગાહી access_time 12:33 pm IST

  • મોડીરાત્રે પૂર્વ કાશ્મીરમાં 5,1ની તીવ્રતાનો જોરદાર ભૂકંપ access_time 1:10 am IST

  • કોંગ્રેસના ૨૩ કોર્પોરેટરો સસ્પેન્ડ : પાટણના નગરપાલીકાના મેન્ડેટના ઉલ્લંધનના મામલે પ્રદેશ કોંગ્રેસ દ્વારા બાગી ૨૩ કોર્પોરેટરને સસ્પેન્ડ કરાયા access_time 4:05 pm IST