Gujarati News

લખનૌ તા. ૬ : ઉત્તર પ્રદેશના સીતાપુરમાં આંગણવાડીની મહિલા કાર્યકર્તાઓના વિરોધની એક અનોખી રીત જોવા મળી. સીતાપુરમાં મહિલા આંગણવાડી કર્મચારી સંઘની જિલ્લા અઘ્યક્ષ નીતૂ સિંહે મંગળવારે આંગણવાડી કાર્યકર્તાઓની વિભિન્ન માંગણીઓને લઈને સીએમ યોગી આદિત્યનાથ સાથે સાંકેતિક રૂપે લગ્ન કર્યા.

કાર્યકર્તાઓની લાંબા સમયની માંગણીઓ પર સીએમનું ધ્યાન આકર્ષિત કરવાના ઉદ્દેશ્યથી વિરોધની આ અનોખી રીતનો ઉપયોગ કરવામાં આવ્યો. મંગળવારે થયેલા આ સાંકેતિક વિવાહની બધી વિધિ જિલ્લાના વિકાસ ભવનના પરિસરમાં પૂર્ણ કરવામાં આવી.

ખાસ વાત એ છે કે આ દરમિયાન વૈદિક મંત્રો વચ્ચે જિલ્લાધ્યક્ષે સંપૂર્ણ વિધિ સાથે સીએમ યોગીની તસવીરથી સાંકેતિક રૂપે લગ્ન કર્યા. લગ્નની આ વિધિ બાદ તેમણે સ્થાનિક મંદિરમાં દર્શન પણ કર્યા. સાંકેતિક લગ્નની આ પ્રક્રિયા દરમિયાન મોટી સંખ્યામાં આંગણવાડી કાર્યકર્તાઓ અને અન્ય લોકો પણ ઉપસ્થિત રહ્યા.