Gujarati News

વોશિંગ્ટન તા. ૬ : અમેરિકામાં કોરોનાના બીજા રાઉન્ડમાં કોરોના વધુ જોર સાથે ત્રાટકયો છે. દેશમાં વિતેલા ૨૪ કલાકમાં રેકોર્ડબ્રેક ૧.૧૭ લાખ નવા કેસ નોંધાયા છે. કોરોના આવ્યો ત્યારથી એક દિવસમાં નોંધાયેલા આ સૌથી વધુ કેસ છે.

ન્યૂયોર્ક ટાઈમ્સના અહેવાલ અનુસાર દેશમાં ૧.૧૭ લાખ નવા કેસ નોંધાયા હતા. દેશના ૪૩ રાજયોમાં નવા કેસોનો આંકડો સતત વધી રહ્યો છે. ટેસ્ટિંગ સેન્ટર્સ પર પણ લાંબી લાઈનો જોવા મળી રહી છે.

આઈવોમાં છેલ્લા બે સપ્તાહમાં કેસોમાં ૧૧૮ ટકાનો વધારો થતાં ગવર્નરે લોકોને ત્રણ સપ્તાહ સુધી વાયરસનો ફેલાવો ના થાય તે માટે દરેક સંભવ પ્રયાસ કરવા માટે અપીલ કરી છે. અહીંની હોસ્પિટલ્સે પણ સરકારને ચેતવણી આપી દીધી છે કે કેસ આ રીતે જ વધતા રહ્યા તો સ્થિતિ સંભાળવી મુશ્કેલ બની જશે.

અમેરિકાના વર્જિનિયિમાં હેનરી કાઉન્ટી પબ્લિક સ્કૂલ્સ ડિસ્ટ્રિકટમાં હજુ ગયા મહિને જ સ્કૂલો શરુ કરાઈ હતી. જોકે, ૨૨ કર્મચારીઓ અને સ્ટૂડન્ટ્સને કોરોના થઈ જતાં સેંકડો લોકોને કવોરન્ટાઈન કરવાની નોબત આવી છે. કોરોનાને કારણે અમેરિકામાં અનેક જગ્યાએ સ્કૂલો ફરી બંધ કરવાની ફરજ પડી છે, તો કયાંક તેમની ખૂલવાની તારીખ લંબાવાઈ છે.

દુનિયામાં સૌથી વધુ કેસ ધરાવતા અમેરિકામાં સપ્ટેમ્બરની મધ્યમાં નવા કેસોની સંખ્યામાં ખાસ્સો ઘટાડો થયો હતો. રોજ નોંધાતા કેસોનો આંકડો ૩૦-૩૫ હજાર સુધી પહોંચી જતાં કોરોના નબળો પડી રહ્યો હોવાનું લાગી રહ્યું હતું. જોકે, ચૂંટણી પૂરી થતાં જ કોરોનાએ ફરી કહેર વર્તાવવાનું શરૂ કર્યું છે.

અમેરિકામાં શિયાળો શરૂ થઈ ગયો છે, ત્યારે કોરોનાને કારણે હોસ્પિટલાઈઝ થનારા લોકોની સંખ્યા પણ વધી રહી છે. જેના કારણે સત્તાધીશોમાં ફરી બેડની અછત સર્જાશે કે કેમ તે વાતને લઈને ચિંતા વ્યાપી ગઈ છે. હાલ અમેરિકામાં ઓગષ્ટ મહિનાની સરખામણીએ વધુ પેશન્ટ્સ હોસ્પિટલમાં છે.

અમેરિકાની સાથે યુરોપમાં પણ નવા કેસો સતત વધી રહ્યા છે. જેના કારણે ફ્રાંસમાં ફરી નાઈટ કફર્યુ શરુ કરાયો છે, અને બ્રિટનમાં પણ અનેક નિયંત્રણો લાદવામાં આવ્યા છે. સ્કૂલો પણ ફરી બંધ કરવામાં આવી રહી છે.

એકસપર્ટ્સનું માનવું છે કે શિયાળામાં તાપમાન ગગડવાથી તેમજ લોકોમાં બેદરકારી વધવાથી કોરોનાના કેસ વધવાની આશંકા હતી, જે હવે સાચી પડી રહી છે. લોકો માસ્ક પહેરવાનું ટાળી રહ્યા છે, અને ભીડભાડ કરી રહ્યા છે જે ખતરનાક સાબિત થઈ શકે છે.

યુનિવર્સિટી ઓફ વોશિંગ્ટનના ઈન્સ્ટિટ્યૂટ ફોર હેલ્થ મેટ્રિકસ એન્ડ ઈવેલ્યૂએશનના એક અનુમાન અનુસાર અમેરિકામાં આગામી ત્રણ મહિનામાં કોરોનાથી ૧.૩૫ લાખ લોકોના મોત થઈ શકે છે. નવેમ્બરથી ફેબ્રુઆરીનો ગાળો સૌથી ખતરનાક સાબિત થઈ શકે છે.

જહોન્સ હોપકિન્સ યુનિ.ના એપિડેમિઓલોજિસ્ટ કેઈટલિન રિવર્સ પણ ઉંચા પોઝિટિવિટી રેટ અને હોસ્પિટલાઈઝેશનના વધતા પ્રમાણને ચિંતાજનક ગણાવી રહ્યા છે. તેમનું કહેવું છે કે આ બાબત દેશમાં કોમ્યુનિટી ટ્રાન્સમિશન વધ્યું હોવાનો સ્પષ્ટ સંકેત આપી રહી છે.

ઉલ્લેખનીય છે કે, સપ્ટેમ્બરમાં અમેરિકામાં નવા કેસો ઘટી રહ્યા હતા ત્યારે ભારતમાં તેમાં મોટો ઉછાળો આવ્યો હતો. હવે ભારતમાં કેસો ઘટી રહ્યા છે ત્યારે અમેરિકામાં અચાનક મોટો ઉછાળો આવ્યો છે. તેવામાં ભારતમાં પણ કોરોનાનો બીજો રાઉન્ડ આવશે કે કેમ તે સવાલ ઉઠી રહ્યા છે.