Gujarati News

નવી દિલ્હી : આંતરરાષ્ટ્રીય બોર્ડર પર પાકિસ્તાનમાં સ્થિત કરતારપુર સાહેબ પર ગુરુ નાનકના 550માં પ્રકાશ પર્વની તૈયારીઓ ચાલી રહી છે. 9 નવેમ્બરે આ કોરિડોરનું ઉદ્ઘાટન થવાનું છે.  આ પહેલાં પાકિસ્તાની સરકારે કરતારપુર સાહેબ માટે એક આધિકારિક ગીત લોન્ચ કર્યુ છે. ત્રણ ભાગમાં પોસ્ટ કરવામાં આવેલા આ ગીતમાં પંજાબ કોંગ્રેસના નેતા નવજોતસિંહ સિદ્ધૂને દેખાડવામાં આવ્યા છે.

આ ઉપરાંત જરનૈલ સિંહ ભિંડરાવાલે સહિત અન્ય ખાલિસ્તાની લીડર્સની તસવીર પણ આ વીડિયોમાં દેખાડવામાં આવી છે. પાકિસ્તાને લગભગ ચાર મિનિટનો આ વીડિયો જાહેર કર્યો છે જેમાં પાકિસ્તાન દ્વારા કરતારપુર સાહેબ ગુરૂદ્વારાને લઈને ચાલી રહેલી તૈયારીઓ, ભારતથી પહોંચેલા શીખ શ્રદ્ધાળુઓના અનુભવને દેખાડવામાં આવ્યા છે.

આ ઉપરાંત કરતારપુર કોરિડોરના પાયા વખતે પાકિસ્તાની વડાપ્રધાન ઈમરાન ખાનના ભાષણને પણ દેખાડવામાં આવ્યું છે. આ વીડિયોમાં સિદ્ધૂ ઉપરાંત ખાલિસ્તાની સમર્થક જરનૈલસિંહ ભિંડરાવાલે, અમરીકસિંહ ખાલસા અને મેજર જનરલ શાહબેગસિંહની તસવીરવાળા પોસ્ટર્સને પણ દેખાડવામાં આવ્યા છે. આ ત્રણેય ખાલિસ્તાની સમર્થકો 1984માં થેયલાં ઓપરેશન બ્લૂસ્ટારમાં ઠાર મરાયા હતા.