Gujarati News

મુંબઇ તા. ૬ : બોલિવૂડમાં 'મૈને પ્યાર કિયા', 'હમ આપકે હૈ કૌન' જેવી ફિલ્મ્સમાં પોતાન અવાજ આપનારા સિંગર એસપી બાલાસુબ્રમણ્યમ કોરોનાના સંક્રમણના કારણે હોસ્પિટલમાં સારવાર હેઠળ છે.

સામાન્ય લોકો હોય કે પછી હોય ખાસ સેલિબ્રિટી, કોરોના વાયરસ દરેકને પોતાની ઝપેટમાં લેતો આવ્યો છે. તાજેતરમાં જ મહાનાયક અમિતાભ બચ્ચનને સંક્રમણ થયા બાદ સ્વસ્થ થઈ ઘરે પરત ફર્યાં તો વધુ એક સેલિબ્રિટી કોરોનાની ઝપેટમાં આવ્યાં છે. ૭૪ વર્ષના સિંગર એસપી બાલાસુબ્રમણ્યમને કોરોના થયો છે. તેમણે વિડીયો શેર કરીને જણાવ્યું કે ઠંડી અને તાવ સાથે તેમને છાતિમાં પણ બળતરા હતી. જેના કારણે તેમણે ટેસ્ટ કરાવ્યો અને આ ટેસ્ટ પોઝિટિવ આવ્યો હતો.

સિંગર બાલાસુબ્રમણ્યમને કોરોના સંક્રમણ છે. તેઓ સારવાર માટે હોસ્પિટલમાં દાખલ થયાં છે. તેમણે વિડીયો દ્વારા જણાવ્યું કે તેમને કોરોનાના હળવા લક્ષણો છે. જોકે, સાવધાની માટે તેઓ હોસ્પિટલમાં સારવાર માટે દાખલ થઈ ગયા છે. ચિંતાની કોઈ જ વાત નથી. ડોકટર્સે તેમને ઘરે જ રહેવાની સલાહ આપી હતી અને દવા લેવાની સૂચના આપી હતી પરંતુ તેમનો પરિવાર ચિંતા કરતો હતો જેથી તેઓ હોસ્પિટલમાં જ એડમિટ થઈ ગયા હતાં.

બાલાસુબ્રમણ્યમે વિડીયોમાં જણાવ્યું કે, '૨-૩ દિવસથી મારી તબીયત થોડી ખરાબ લાગી રહી હતી. છાતિ ભિંસાતી હોય તેવું લાગતું હતું અને તાવ પણ આવી રહ્યો હતો. આ ઉપરાંત કોઈ સમસ્યા નહોતી. જોકે, હું તેને હળવાશથી લેવા ઈચ્છતો નહોતો. આ માટે ચેકઅપ કરાવવા હોસ્પિટલ ગયો હતો. મને ડોકટર્સે જણાવ્યું કે કોરોનાના હળવા લક્ષણો છે. તેમણે દવા આપી અને કહ્યું કે હું ઘરે રહી શકું છું. તેમણે ૧૫ દિવસ માટે સેલ્ફ કવોરન્ટીન થવાનું કહ્યું હતું. જોકે, હું પરિવારને લઈને જોખમ વહોરવા માગતો નહોતો. આ માટે હું હોસ્પિટલમાં જ સારવાર લેવા તૈયાર થઈ ગયો. મારા ડોકટર્સ મિત્રો સારી દેખરેખ રાખી રહ્યાં છે.'

બાલાસુબ્રમણ્યમે ફેન્સ અને શુભચિંતકોને આગ્રહ કર્યો છે કે, તેમનો કોન્ટેકટ કરીને પરેશાન ન કરે. તેમણે જણાવ્યું કે, તેમને માત્ર શરદી અને તાવ છે. અનેક લોકો તેમને ફોન કરી રહ્યાં છે અને તેઓ ફોન ઉઠાવી શકતા નથી. તેમણે આગળ એ પણ જણાવ્યું હતું કે, તેઓ ટૂંક સમયમાં જ સ્વસ્થ થઈ જશે.(૨૧.૫)