Gujarati News

Gujarati News

News of Wednesday, 6th July 2022

ઓસ્ટ્રેલિયાની વસ્તીમાં હિંદુ અને મુસ્લિમોની વસ્તી ખ્રિસ્તીઓ કરતાં વધુ ઝડપથી વધી ! : દેશમાં ખ્રિસ્તીઓની વસ્તી 50 ટકાથી પણ ઓછી

નાસ્તિકોની સંખ્યા વધીને 39 ટકા થઈ, છેલ્લા 5 વર્ષમાં તેમાં 9 ટકાનો વધારો થયો : વસ્તી ગણતરીમાં ચોકવનારી માહિતી સામે આવી

નવી દિલ્લી તા.06 : ખ્રિસ્તીઓનાં દેશ ઓસ્ટ્રેલિયામાં ખ્રિસ્તી લોકો કરતાં હિંદુ અને મુસ્લિમોનો હિસ્સો ઝડપથી વધતો જોવા મળી રહ્યો છે. ઓસ્ટ્રેલિયામાં દર 5 વર્ષે થતી વસ્તી ગણતરીનાં આંકડાઓ અનુસાર, દેશમાં ખ્રિસ્તીઓની વસ્તી 50 ટકાથી પણ ઓછી છે. જ્યારે નાસ્તિકોની સંખ્યા 9 ટકા વધીને 39 ટકા થઈ ગઈ છે

ઓસ્ટ્રેલિયાની વસ્તીમાં હિંદુ અને મુસ્લિમોનો હિસ્સો ઝડપથી વધ્યો છે. ઓસ્ટ્રેલિયામાં દર 5 વર્ષે વસ્તી ગણતરી કરવામાં આવે છે, જેના ડેટાથી ઘણી નવી માહિતી બહાર આવી છે. જેનાં આંકડા અનુસાર, ઓસ્ટ્રેલિયાની વસ્તી 25 મિલિયનને વટાવી ગઈ છે. હવે દેશની વસ્તી વધીને 25.55 મિલિયન થઈ ગઈ છે, જે 2016માં 2.34 મિલિયન હતી. આ રીતે છેલ્લા 5 વર્ષમાં દેશની વસ્તીમાં 21 લાખનો વધારો થયો છે.

વસ્તી ગણતરીના આંકડા દર્શાવે છે કે ઓસ્ટ્રેલિયામાં પ્રથમ વખત દેશમાં ખ્રિસ્તીઓની સંખ્યા 50 ટકાથી નીચે આવી ગઈ છે. હવે માત્ર 44% ખ્રિસ્તીઓ ઓસ્ટ્રેલિયામાં રહે છે. જ્યારે 50 વર્ષ પહેલા આ આંકડો 90 ટકા હતો. આ પછી પણ દેશમાં ખ્રિસ્તી ધર્મને માનનારા લોકોની સંખ્યા હજુ પણ સૌથી વધુ છે. આ પછી બીજા નંબર પર 39 ટકા લોકો એવા છે જેઓ કોઈપણ ધર્મમાં માનતા નથી. ઓસ્ટ્રેલિયા વિશ્વના એવા દેશોમાંનો એક છે જ્યાં કુલ વસ્તીમાં નાસ્તિકોની ટકાવારી એટલી વધારે છે. એટલું જ નહીં ઓસ્ટ્રેલિયામાં હિન્દુ અને ઈસ્લામ પણ ઝડપથી વધતા જોવા મળ્યા છે. આ પછી પણ બંને ધર્મોને અનુસરનારા લોકોની સંખ્યા માત્ર 3-3 ટકા છે. પરંતુ છેલ્લી વસ્તી ગણતરી સાથેની સરખામણી દર્શાવે છે કે બંને ધર્મના લોકોની સંખ્યા વધી રહી છે. 2016માં ઓસ્ટ્રેલિયામાં હિન્દુ વસ્તી 1.9% અને મુસ્લિમ વસ્તી 2.6% હતી. આ રીતે ઓસ્ટ્રેલિયામાં હિન્દુઓની સંખ્યામાં મોટો વધારો થયો છે. તેનું કારણ એ છે કે ભારત સહિત વિશ્વભરમાંથી ઓસ્ટ્રેલિયામાં વસવાટ કરતા હિન્દુઓની સંખ્યામાં ઝડપથી વધારો થયો છે.

ડેટામાં બીજી એક વાત સામે આવી છે કે દેશની અડધાથી વધુ વસ્તીનો જન્મ વિદેશમાં છે અથવા તો તેમના માતા-પિતા વિદેશમાં જન્મ્યા છે. કોરોના મહામારી દરમિયાન અન્ય દેશોમાંથી ઓસ્ટ્રેલિયા આવનારાઓની ગતિ થોડી ધીમી પડી છે. પરંતુ છેલ્લા પાંચ વર્ષ દરમિયાન અન્ય દેશોમાંથી 10 લાખથી વધુ લોકો દેશમાં આવ્યા છે. આમાંથી લગભગ ચોથા ભાગના લોકો ભારતમાંથી ત્યાં પહોંચ્યા છે. ઓસ્ટ્રેલિયામાં હાલમાં સૌથી વધુ લોકો ઓસ્ટ્રેલિયામાં જન્મ્યા છે. પછી એવા લોકો છે જેઓ ઈંગ્લેન્ડમાં જન્મ્યા હતા. આ બંને દેશો પછી ત્રીજો નંબર ભારતમાં જન્મેલા લોકોનો છે.

(10:46 pm IST)