Gujarati News

મુંબઈ, તા. ૬ : ઘરેલું શેરબજારો ગુરુવારે ઊંચા મથાળે બંધ રહ્યા હતા. બીએસઈનો ૩૦ શેરોનો સંવેદનશીલ સૂચકાંક સેન્સેક્સ  આજે ૨૭૨.૨૧ પોઇન્ટ અથવા ૦.૫૬ ટકાના વધારા સાથે ૪૮,૯૪૯.૭૬ ના સ્તરે બંધ રહ્યો હતો. એ જ રીતે એનએસઈ નિફ્ટી ૧૦૬.૯૫ પોઈન્ટ એટલે કે ૦.૭૩ ટકાના વધારા સાથે ૧૪,૭૨૪.૮૦ પોઇન્ટના સ્તર પર બંધ થયો છે. એનએસઈના નિફ્ટીમાં હિન્દાલ્કો, હીરો મોટોકોર્પ, વિપ્રો, ટાટા મોટર્સ અને ટાટા સ્ટીલ સૌથી વધુ ઊંચકાયા હતા. તે જ સમયે, યુપીએલ, બજાજ ફિનસર્વ, પાવરગ્રિડ, સન ફાર્મા અને એનટીપીસીના શેર લાલ નિશાન સાથે બંધ થયા છે.

સેંસેક્સમાં બજાજ ઓટો, એચડીએફસી, ટેક મહિન્દ્રા, ઈન્ફોસીસ અને નેસ્લે ઈન્ડિયા સૌથી વધુ વધ્યા હતા. આ ઉપરાંત મારુતિ, ટાઇટન, કોટક મહિન્દ્રા બેંક, આઈસીઆઈસીઆઈ બેંક, એચસીએલ ટેક, અલ્ટ્રાટેક સિમેન્ટ, આઇટીસી, રિલાયન્સ, ટીસીએસ, બજાજ ફાઇનાન્સ, લાર્સન અને ટુબ્રો, એચડીએફસી બેંક, ડો. રેડ્ડીઝ અને એસબીઆઈના શેર લીલા નિશાને બંધ રહ્યા છે.

જિયોજિત ફાઇનાન્શિયલ સર્વિસીસના વડા (સંશોધન) વિનોદ નાયરે જણાવ્યું હતું કે, કોવિડ -૧૯ ના વધતા જતા કેસોમાં, રસીકરણ દ્વારા રિકવરી ની આશા અને સકારાત્મક વૈશ્વિક સંકેતોને પગલે સ્થાનિક શેર બજારોમાં તેજી આવી. રસી ઉપર બૌદ્ધિક સંપત્તિના નિયમોને માફ કરવાના બીડેનના નિર્ણયને પગલે આખો દિવસ આશાની એક નવી કિરણ ઉભી થઈ છે. આ ક્ષેત્રની કંપનીઓના શેરના ત્રિમાસિક પરિણામો અપેક્ષા કરતા સારા દેખાતા હોવાથી ધાતુ ક્ષેત્રના શેરોમાં ઘણી વૃદ્ધિ જોવા મળી છે. ઓટો અને આઇટી એ અન્ય અગ્રણી ક્ષેત્ર છે. તે જ સમયે, મીડ અને સ્મોલ કેપ શેરોમાં આ વલણ જોવા મળી રહ્યું છે.

ચીન સિવાય એશિયાના અન્ય બજારોની વાત કરીએ તો શેર બજારો તેજી સાથે બંધ રહ્યા હતા. આ કારણ છે કે કોવિડ -૧૯ રોગચાળાની અસરો વચ્ચે રોકાણકારોએ આર્થિક સુધારણાના સંકેતો જોયા છે. ચલણ બજારની વાત કરીએ તો ડોલર સામે રૂપિયો ૧૩ પૈસા મજબૂતી સાથે ૭૩.૭૮ પર બંધ રહ્યો છે.