Gujarati News

Gujarati News

News of Tuesday, 5th January 2021

બ્રિટનમાં ફરી લોકડાઉન : ૫.૬ કરોડ લોકો ઘરોમાં કેદ

કોરોના વાયરસના નવા સ્વરૂપે બ્રિટનને સંકટમાં મુકી દીધું : સરકારે લીધો કઠોર નિર્ણય : ૧ સપ્તાહમાં મૃતકોની સંખ્યા ૨૦ ટકા વધીઃ ફેબ્રુઆરીના મધ્ય સુધી એક નવું સ્ટે-ઓન -હોમ લોકડાઉન લાગુ : શાળા -કોલેજો ઓનલાઇન ચાલશે

લંડન,તા. ૫: બ્રિટનના વડાપ્રધાન બોરિસ જહોન્સને કોરોના વાયરસના નવા સ્ટ્રેનના વધતા જતા કેસોના પગલે દેશમાં ફરીથી લોકડાઉનની જાહેરાત કરી છે. બોરિસ જહોન્સને જણાવ્યું હતું કે, જીવલેણ વાયરસ ઝડપથી ફેલાઈ રહ્યુ છે તેને અટકાવવા માટે ઓછામાં ઓછું ફેબ્રુઆરીના મધ્ય સુધી કોરોના સામેની લડત માટે એક નવું સ્ટે-ઓન-હોમ લોકડાઉન લાગુ કરવામાં આવ્યું છે.

આ જાહેરાત સાથે બ્રિટિશ વડાપ્રધાને લોકોને ઘરમાં રહેવાની અપીલ કરી છે. મંગળવારથી શાળાઓ, કોલેજો અને યુનિવર્સિટીઓ ઓનલાઇન ચાલશે. લોકડાઉનની જાહેરાત સાથે લોકો હવે ઘરની બહાર જવાનું લગભગ બંધ કરી દેશે. ફકત જરૂરી કામથી જ લોકો બહાર નીકળી શકશે.

વડાપ્રધાન બોરીસે સોમવારે રાત્રે દેશને સંબોધન કરતા કહ્યું કે, ચેપના કેસોમાં વધારો થઈ રહ્યો છે, તે સ્પષ્ટ થઈ ગયું છે કે આપણે વધુ સખત મહેનત કરવાની જરૂર છે. તેમણે કહ્યું કે, ઇંગ્લેંડમાં આપણે રાષ્ટ્રીય લોકડાઉનમાં જવું જોઈએ કારણ કે કોરોનાના નવા સ્ટ્રેન સામે આ કડક પગલું પૂરતું છે. આનો અર્થ એ કે, સરકાર ફરી એકવાર તમને ઘરે રહેવા નિર્દેશ આપી રહી છે.

લોકડાઉનની જાહેરાત સાથે પીએમ બોરીસે એમ પણ કહ્યું કે, લોકો જરૂરી કાર્યો માટે ઘરની બહાર જઇ શકે છે. જેમ કે, જરૂરી ચીજ-વસ્તુઓ, વર્ક ફ્રોમ હોમ ન કરવામાં અસમર્થ છો તો ઓફિસ જવા જેવી બાબત, એકસરસાઈઝ, તબીબી સહાય તેમજ ઘરેલું હિંસા ટાળવા ઘરેથી બહાર જઈ શકો છો.

તેમણે જણાવ્યું હતું કે બ્રિટનમાં સૌથી મોટો રસીકરણનો કાર્યક્રમ શરૂ થયો છે અને બાકીના યુરોપ કરતાં વધુ લોકોને રસી આપવામાં આવી છે. તેમણે કહ્યું કે, રસીકરણ વેગ પકડી રહ્યું છે. તેનું કારણ ઓકસફર્ડ-એસ્ટ્રાઝેનેકા રસી છે, જેનું રસીકરણ આજથી શરૂ કરવામાં આવ્યું છે.

(11:17 am IST)