Gujarati News

ફૈઝાબાદ: ઉત્તરપ્રદેશના ફૈઝાબાદમાં ડૉ. રામ મનોહર લોહિયા અવધ યુનિવર્સિટીમાં એક વિદ્યાર્થીના એડમિટ કાર્ડ પર અમિતાભ બચ્ચનનો ફોટો છપાયો છે. વિદ્યાર્થીએ આ વિશે કોલેજ પ્રશાસનને આ વિશે જાણ કરી છે. કોલેજે આ મામલે સ્પષ્ટતા પણ કરી છે. યુનિવર્સિટી સંલગ્ન કોલેજ રવીંદ્ર સિંહ સ્મારક મહાવિદ્યાલય, ગોંડામાં બીએડનો અભ્યાસ કરી રહેલા વિદ્યાર્થીને એડમિટ કાર્ડ આપવામાં આવ્યું જેમાં વિદ્યાર્થીના બદલે બોલિવુડ એક્ટર અમિતાભ બચ્ચનની તસવીર છે.

આ એડમિટ કાર્ડ મળતાં જ વિદ્યાર્થીને અન્ય ડોક્યુમેન્ટ્સમાં પણ આ પ્રકારે ભૂલ હોવાની ચિંતા થવા લાગી. ANI સાથે વાત કરતાં વિદ્યાર્થીએ જણાવ્યું કે, “મેં ફોર્મ ભરતી વખતે મારી જ તસવીર લગાવી હતી. મને ડર છે કે ક્યાંક માર્કશીટમાં પણ મારા બદલે અમિતાભ બચ્ચનની તસવીર ના હોય.”

આ મામલે સ્પષ્ટતાં કરતાં ગોંડા સ્થિત રવીંદ્ર સિંહ સ્મારક મહાવિદ્યાલયના સંચાલક જી મિશ્રાએ કહ્યું કે, “બની શકે છે કે વિદ્યાર્થીએ અથવા તો જે સાયબર કેફેમાંથી આ ફોર્મ ભરવામાં આવ્યું હોય ત્યાંથી આ ગરબડ થઈ હોય. વિદ્યાર્થી પરીક્ષા આપી રહ્યો છે. આ મામલે અમે પ્રિન્સિપાલને જાણ કરી છે. અમારો પ્રયાસ રહેશે કે જ્યારે માર્કશીટ આવે ત્યારે આવી ભૂલ ના થાય.”