Gujarati News

નવી દિલ્‍હીઃ ઓડિશાના બાલાસોરમાં ટ્રેન દુર્ઘટનાની ઉચ્ચ સ્તરીય તપાસના આદેશ આપવામાં આવ્યા છે. કેન્દ્રીય રેલ્વે મંત્રી અશ્વિની વૈષ્ણવ આ સમગ્ર મામલામાં સતત નજર રાખી રહ્યા છે. અશ્વિની વૈષ્ણવે રવિવારે (4 જૂન) આ વિશે મોટી માહિતી શેર કરી હતી. રેલવે મંત્રીએ કહ્યું કે રેલવે સુરક્ષા કમિશનરે આ મામલે તપાસ કરી છે. અકસ્માતનું કારણ શોધી કાઢવામાં આવ્યું છે અને તેના માટે જવાબદાર લોકોની પણ ઓળખ કરવામાં આવી છે. તેમણે કહ્યું કે ઈલેક્ટ્રોનિક ઈન્ટરલોકિંગમાં ફેરફારને કારણે આ અકસ્માત થયો છે.

અશ્વિની વૈષ્ણવે કહ્યું, 'બાલાસોરમાં ત્રણ ટ્રેનની ટક્કરમાં 288 મુસાફરોના મોત થયા છે. કમિશનર ઓફ રેલ્વે સેફ્ટીએ આ મામલે તપાસ કરી છે અને ઘટનાનું કારણ અને તેના માટે જવાબદાર લોકોની ઓળખ કરી લેવામાં આવી છે. રેલ્વે મંત્રીએ વધુમાં કહ્યું કે રેલ્વે સુરક્ષા કમિશનરે આ મામલે તપાસ કરી છે. તપાસ રિપોર્ટ આવે ત્યાં સુધી રાહ જોવી પડશે. પરંતુ અમે ઘટનાનું કારણ અને તેના માટે જવાબદાર લોકોની ઓળખ કરી લીધી છે. ઈલેક્ટ્રોનિક ઈન્ટરલોકિંગમાં ફેરફારને કારણે આ અકસ્માત થયો હતો." જણાવી દઈએ કે, આ દુર્ઘટનામાં અત્યાર સુધીમાં 288 લોકોએ જીવ ગુમાવ્યા છે, જ્યારે 1000થી વધુ લોકો ઘાયલ થયા છે.

આ પહેલા શનિવારે રેલવે મંત્રાલયે માહિતી આપી હતી કે ઓડિશાના બાલાસોરમાં રિપેરિંગ કામ યુદ્ધના ધોરણે ચાલી રહ્યું છે. એક ટ્વિટમાં, રેલ્વે મંત્રાલયે કહ્યું હતું કે અધિકારીઓ દુર્ઘટના સ્થળ પર પુનઃસ્થાપન પ્રક્રિયા પર નજીકથી નજર રાખી રહ્યા છે. 7 પોકલેન મશીનો, 2 અકસ્માત રાહત ટ્રેનો અને 3-4 રેલ્વે અને રોડ ક્રેન્સ વહેલા પુનઃસ્થાપન માટે તૈનાત કરવામાં આવી છે. ભારતીય વાયુસેના (IAF)એ મૃતકો અને ઘાયલોને બહાર કાઢવા માટે Mi-17 હેલિકોપ્ટરનો ઉપયોગ કર્યો છે. ઈસ્ટર્ન કમાન્ડના જણાવ્યા અનુસાર, IAF અને સિવિલ એડમિનિસ્ટ્રેશન અને ભારતીય રેલવેએ તમામ શક્ય બચાવ પ્રયાસો કર્યા છે.

રેલ્વે મંત્રીએ વધુમાં કહ્યું કે અત્યારે અમારું ધ્યાન શક્ય તેટલી વહેલી તકે રૂટને પુનઃસ્થાપિત કરવા પર છે. આ તમામ કામગીરી બુધવારે સવાર સુધીમાં પૂર્ણ થઈ જશે. અમે આ લક્ષ્ય તરફ આગળ વધી રહ્યા છીએ. વૈષ્ણવે કહ્યું, “વડાપ્રધાન નરેન્દ્રભાઇ મોદીએ ગઈ કાલે સ્થળનું નિરીક્ષણ કર્યું હતું. અમે આજે ટ્રેક પુનઃસ્થાપિત કરવાનો પ્રયાસ કરીશું. તમામ મૃતદેહો બહાર કાઢવામાં આવ્યા છે. અમારો ટાર્ગેટ છે કે બુધવારની સવાર સુધીમાં રિસ્ટોરેશનનું કામ પૂર્ણ કરી દેવામાં આવે જેથી ટ્રેન આ ટ્રેક પર દોડવાનું શરૂ કરી શકે.