Gujarati News

મુંબઈ, તા. ૩ : રિક્ષાની લોનના ઈએમઆઈ ભરવાના પૈસા ના હોવા છતાંય એક ઈમાનદાર રિક્ષાચાલકે ૧૪ લાખનું ગોલ્ડ અને કેશ ભરેલી બેગને પરત કરી માણસાઈનું અનોખું ઉદાહરણ રજૂ કર્યું છે. મુંબઈના મીરાંરોડ વિસ્તારમાં રહેતા રિક્ષાચાલક ઈફ્તિખાર શેખની રિક્ષામાં રવિવારે એક મહિલા પેસેન્જર બેઠાં હતાં, અને તેઓ પોતાની બેગ રિક્ષામાં ભૂલી ગયાં હતાં.

ઈફ્તિખાર શેખની રિક્ષામાં નસરીન શેખ નામના એક મહિલા રિક્ષાચાલક બેઠાં હતાં, અને ગુજરાત જવાની બસ પકડવા માટે હાઈવે ઉતરી ગયા હતા. ત્યાબાદ ઈફ્તિખારે બીજા પણ કેટલાક પેસેન્જરોને બેસાડ્યા હતા, અને આખો દિવસ ધંધો કર્યા બાદ આખરે સાંજે તેઓ પોતાના ઘરે પરત ફર્યા હતા.

બીજા દિવસે જ્યારે તેઓ રિક્ષા સાફ કરી રહ્યા હતા ત્યારે તેમને પેસેન્જર સીટની પાછળની જગ્યાએથી એક બેગ મળી હતી. ઈફ્તિખારે બેગ ખોલીને જોયું તો તેમાં રોકડા રુપિયા અને દાગીના ભરેલા હતા. બેગ જોતાં જ તેઓ તરત જ કાશીમીરા પોલીસ સ્ટેશન પહોંચ્યા હતા, અને બેગ પોલીસને સોંપી દીધી હતી. તેમણે પોલીસને એમ પણ જણાવ્યું હતું કે રવિવારે તેમની રિક્ષામાં એક મહિલા આ જ બેગ લઈને બેઠી હતી, પરંતુ તેમની પાસે તેની બીજી કોઈ વિગતો નથી.

બેગની અંદર પોલીસને એક મોબાઈલ ફોન મળ્યો હતો, જેના દ્વારા તરત જ નાઝનીન શેખનો પત્તો મેળવી લેવાયો હતો. બીજી તરફ, જેની બેગ હતી તે મહિલા નાઝનીને તેના ખોવાઈ જવાની ચિંતામાં ગુજરાત જવાનું પડતું મૂક્યું હતું, અને તેઓ રિક્ષાચાલકને શોધી રહ્યા હતા, જોકે તેનો ક્યાંય પત્તો નહોતો મળી રહ્યો.

આખરે પોલીસે કેટલીક વિગતો કન્ફર્મ કર્યા બાદ કેશ અને ૧૪ લાખ રુપિયાના દાગીનાથી ભરેલી બેગ તેનાં મૂળ માલિકને પરત કરી હતી. બેગના માલિકનો પત્તો મળ્યા બાદ ઈફ્તિખારને પણ પોલીસ સ્ટેશન બોલાવ્યો હતો, અને તેની પાસેથી બેગના માલિકની ઓળખ કરાવી હતી. તે વખતે પોલીસકર્મીઓને જાણવા મળ્યું હતું કે ઈફ્તિખારે રિક્ષા લોન પર લીધેલી છે, લોકડાઉનને કારણે ધંધો ઠપ્પ થઈ જતાં તે ઓક્ટોબર મહિનાથી હપ્તા નથી ભરી શક્યો. તે હાલ ઓવરટાઈમ કરીને પણ પૈસા કમાઈ લોન ભરવા માટે મહેનત કરી રહ્યો હોવાનું પણ તેણે પોલીસને જણાવ્યું હતું.