Gujarati News

(પ્રતિનિધિ કપિલા શાહ દ્વારા) શિકાગોઃ જ્યોર્જીયા રાજ્યના એટલાન્ટા શહેરમાં આજથી બે વર્ષ પહેલા મર્સીડીઝ બેન્ઝ કાર કંપનીએ રમતગમતને પ્રોત્સાહીત કરવા માટે એક અદ્યતન સ્ટેડીયમ બાંધેલ છે અને તેમાં ભીન્ન ભીન્ન પ્રકારની ગેઇમ્સો યોજવામાં આવે છે અને ચાલુ વર્ષે તેમાં ફુટબોલની રમત ફેબ્રુઆરી માસની ૩જી તારીખે રવીવારના રોજ યોજાનાર હોવાથી અમરેકીમાં વસવાટ કરતા તમામ લોકોનું ધ્યાન તેના પર કેન્દ્રીત થયેલું જોવા મળે છે. આ સ્ટેડીયમમાં સૌપ્રથમ વખત જ સુપર બાઉલની ફુટબોલની મેચ રમાવાની હોવાથી આ રમતના રસિયાઓમાં ભારે ઉત્સાહ જોવા મળતો હતો અને તેઓ રમત નિહાળવા માટે ઉંચી કિંમતે મોંઘીદાટ ટિકીટો ખરીદવા થનગની રહ્યા હતા.

આ તકનો લાભ લેવા માટે એટલાન્ટાના જાણીતા બીઝનેસમેન કેતન શાહે કર્યો હોવાનું જાણવા મળે છે. અને તેણે એક કહેવાતા કૌભાંડનું આયોજન કરી પોતાના મિત્રોની પાસેથી નાણાં એકત્રિત કરી તેઓને આ ફુટબોલની રમતની ટિકીટો આપવાનું પ્રલોભન આપ્યું હતું અને જાણવા મળે છે તેમ તેમણે ૧ મીલીયન જેટલી માતબર રકમ એકત્રીત કરી ગયા મહીનાના બે-ત્રણ અઠવાડીયા પહેલા રફુચક્કર થઇ ગયો હતો.

આ અંગે વધારામાં જાણવા મળે છે તેમ કેતન શાહે પોતાની માતા જયાબેન પાસે છત્રીસ હજાર ડોલર પણ લીધા હતા અને તે દ્વારા ટિકીટોના વેચાણમાં જે નફો થાય તે આપવા જણાવ્યું હતું. પરંતુ હાલમાં તેમણે તે નાણાં ગુમાવ્યા હોવાનો અહેસાસ થઇ રહ્યો છે અને પોતાના પુત્રની સામે ફરિયાદ નકરવાનો નિર્ણય લીધો હોવાનું જાણવા મળે છે.

સુપર બાઉલના ગેઇમની તારીખ જેમ જેમ નજીક આવતી હતી તેમ તેમ જેમણે આ ગેઇમની ટિકીટ માટે નાણાં આપ્યા હતા તે તમામ લોકોએ કેતનનો સંપર્ક કેળવવા પ્રયાસ કર્યો, પરંતુ તે પલાયન થઇ ગયો હોવાનું જાણવા મળે છે અને તે તમામ લોકોએ સત્તાવાળાઓને ફરિયાદ કરી અને તેમણે તેની શોધખોળ શરૂ કરી પરંતુ તેનો પત્તો લાગ્યો ન હતો.

ભાગેડુ કેતન શાહ ડીજીટલ એકસપ્રેસ પ્રીન્ટંગ નામનો નાક્રોસ ટાઉનમાં બીઝનેસ ધરાવે છે અને તેથી સાથે સાથે જ્યોર્જીયા ઇન્ડો અમેરીકન ચેમ્બર ઓફ કોમર્સના બોર્ડ મેમ્બર તરીકે પણ ફરજ બજાવે છે. પરંતુ આ ચેમ્બરના સત્તાવાળાઓએ તેમને પોતાના હોદ્દા પરથી સસ્પેન્ડ કરી દીધા છે અને જે લોકોએ વિશ્વાસથી ફુટબોલની ગેઇમની ટિકીટો ખરીદવા નાણાં આપેલ તે સર્વેને રોવાનો સમય આવેલ છે. આ હેવાલ લખાઇ રહ્યો છે ત્યં સુધીમાં ગેઇમ શરૂ થઇ નથી તેથી કેતન શાહની સામે કોઇ કાર્યવાહી કરવામાં આવી નથી પરંતુ ત્યારબાદ જરૂરી કાર્યવાહ હાથ ધરવામાં આવશે એવું જાણવા મળે છે.

૩જી ફેબ્રુઆરીના રોજ લોસએન્જલસની ટીમ રેમ્સ અને ન્યુ ઇંગ્લેન્ડની ટીમ પેટ્રીઓટ વચ્ચે ફુટબોલની ગેઇમ રમાનાર છે.