Gujarati News

નવી દિલ્હી તા. ૪ : મોબાઇલ ડેટાનો વપરાશ ૨૦૧૯માં બમણો અને કેટલાક અંદાજ પ્રમાણે ૧૨૫ ટકા વધવાનો અંદાજ છે. લોકસભાની ચૂંટણી પહેલાં મતદારોને રીઝવવા માટે રાજકીય પક્ષોના પ્રયાસ તેમજ પ્રચાર માટે ફેસબૂક, વોટ્સએપ અને યુટ્યૂબ સહિતનાં સોશિયલ મીડિયા પ્લેટફોર્મ્સના ભરપૂર ઉપયોગને કારણે ડેટાના વપરાશમાં મોટા ઉછાળાની શકયતા છે.

મેથી જુલાઈના ગાળામાં ક્રિકેટની સીઝન પણ ભરપૂર છે. માર્ચથી મે મહિનામાં IPL રમાશે. જેમાં ક્રિકેટ ચાહકો મન ભરીને મોબાઇલ ડેટાનો ઉપયોગ કરશે. ઉપરાંત, મે મહિનામાં ક્રિકેટ વર્લ્ડકપ શરૂ થશે, જે જુલાઈના પ્રથમ પખવાડિયા સુધી ચાલશે. ટેલિકોમ કંપનીઓ અને એનાલિસ્ટ્સના જણાવ્યા અનુસાર બે મોટી ક્રિકેટ ઇવેન્ટ્સને કારણે ડેટાના વપરાશને જોરદાર વેગ મળશે.

ભારતી એરટેલના પ્રવકતાએ જણાવ્યું હતું કે, 'ગ્રાહકો માટે સ્માર્ટફોન હાથવગી સ્ક્રીન હોવાથી એરટેલના મોબાઇલ નેટવર્ક પર સપ્ટેમ્બર ૨૦૧૮માં ડેટાનો વપરાશ યુઝર દીઠ ગયા વર્ષની તુલનામાં ૧૨૫ ટકા ઊછળી ૯.૨ જીબી થયો છે અને બે વર્ષમાં તેમાં ૯૦૦ ટકા ઉછાળો નોંધાયો છે. બંડલ્ડ ડિજિટલ કન્ટેન્ટ અને વધુ ગ્રાહકો દ્વારા 4G સ્માર્ટફોન્સમાં અપગ્રેડને કારણે આગામી સમયમાં ડેટા વપરાશમાં મોટો ઉછાળો નોંધાશે.'

કાઉન્ટરપોઇન્ટ ટેક્નોલોજી માર્કેટ રિસર્ચમાં IoT, મોબાઇલ અને ઇકોસિસ્ટમ્સના પાર્ટનર અને રિસર્ચ ડિરેકટર નીલ શાહને સરેરાશ ડેટા વપરાશ વધીને ૨૦૧૯ના પ્રથમ અર્ધવાર્ષિક ગાળામાં યુઝર દીઠ મહિને ૯ જીબી સુધી પહોંચવાનો અંદાજ છે. તે અત્યારના યુઝર દીઠ ૪ જીબીની તુલનામાં ૧૨૫ ટકાની વૃદ્ઘિ દર્શાવે છે. શાહના જણાવ્યા અનુસાર બીજા અર્ધવાર્ષિક ગાળામાં ડેટા વપરાશ ૧૧ જીબીને પણ સ્પર્શી શકે.

ઉલ્લેખનીય છે કે, ૨૦૧૭માં વ્યકિત દીઠ ડેટા વપરાશ ૧.૮ જીબી હતો. જેનું મુખ્ય કારણ સપ્ટેમ્બર ૨૦૧૬માં રિલાયન્સ જિયોની એન્ટ્રીના કારણે ફ્રી કે સસ્તું ઇન્ટરનેટ કહી શકાય. સ્ટરલાઇટ ટેક્નોલોજિસના ડિરેકટર અને એડ્વાઇઝર સંદીપ દાસે જણાવ્યું હતું કે, 'બીજી અને ત્રીજી હરોળનાં શહેરોમાં ડેટાના વપરાશમાં મોટો ઉછાળો નોંધાશે. કારણ કે આ વિસ્તારોમાં ટેલિવિઝન કરતાં મોબાઇલની સંખ્યા વધુ છે અને સ્માર્ટફોનની સંખ્યામાં પણ તીવ્ર ઉછાળો નોંધાયો છે.'

એનાલિસ્ટ્સ અને સોશિયલ મીડિયાના જાણકારોના મતે લોકસભાની ચૂંટણી એપ્રિલ કે મે મહિનામાં યોજાશે, પણ રાજકીય પક્ષો વચ્ચે યુદ્ઘનો પ્રારંભ તો આગામી થોડાં સપ્તાહમાં થઈ જશે. આ વખતે માત્ર મેસેજ કે ફોટોગ્રાફને બદલ રાજકીય લડાઈ વિડિયો દ્વારા થવાની ધારણા છે.

ડિજિટલ એજન્સી આઇસોબારના એમડી (સાઉથ એશિયા) શમસુદ્દીન જસાણીએ જણાવ્યું હતું કે, 'સોશિયલ મીડિયા પર લગભગ ૯૦ ટકા ફીડ વિડિયોની હોય છે. ૨૦૧૯ની ચૂંટણીમાં ડેટાનો વપરાશ ૨૦૧૪ની તુલનામાં ૧૦ ગણો વધશે. રાજકીય પક્ષોની માર્કેટિંગ ઝુંબેશ સોશિયલ મીડિયા અને મેસેજિંગ પ્લેટફોર્મ્સ પર અપલોડ થતાંની સાથે ડેટાના વપરાશમાં મોટી છલાંગ જોવા મળશે.' (૨૧.૬)