Gujarati News

લખનૌ તા. ૩ : ઉત્તર પ્રદેશના લખનઉમાંથી એક અજીબોગરીબ કિસ્સો સામે આવ્યો છે. જેમાં ચોર ચાલતાં ટ્રેલરમાંથી ભારતીય વાયુસેનાના ફાઈટર જેટ મિરાજનું ટાયર ચોરીને ફરાર થઈ ગયા હતા. આ મામલે ટ્રેલરના ચાલકે પોલીસ સ્ટેશનમાં ફરિયાદ નોંધાવી છે. તો બીજી બાજુ એરફોર્સ દ્વારા દેશવિરોધી તત્વોનો હાથ હોવાની આશંકા રાખીને ટ્રેલરચાલકની ધરપકડ કરી છે. અને સાથે ટ્રેલર પણ જપ્ત કરવામાં આવ્યું છે. ઉલ્લેખનીય છે કે, ટ્રેલર દ્વારા ફાઈટર જેટ મિરાજને મધ્ય વાયુ કમાનના સ્ટેશન બીકેટથી ૫ ટાયર જોધપુર એરબેઝ સ્ટેશન મોકલવામાં આવી રહ્યું હતું અને રસ્તામાં ચોરોએ આ ચોરીને અંજામ આપ્યો હતો.

આ ઘટના ૨૭ નવેમ્બર રાત્રના ૨ વાગ્યાની છે, જયારે સેના સાથે સંકળાયેલ ટ્રેલર જેટ પ્લેનનું ટાયર લોડ કરીને જઈ રહ્યું હતું. ટ્રેલરના ડ્રાઈવર અજમેરના રહેવાસી હેમસિંહ રાવતે જણાવ્યું કે, શહીદ પથ પર એસઆર હોટલની પાસે જામ લાગેલો હતો. તે સમયે ટ્રેલરની પાછળ આવતી કાળા રંગની સ્કોર્પિયો કારથી બે લોકો નીચે ઉતર્યા હતા અને દોરડું કાપીને ૧ ટાયર ઉતારી લીધું હતું. ટ્રાફિકને કારણે તે ટ્રેલર રસ્તાના કિનારે ઉભું રાખીને તેઓને પકડી શકયો ન હતો. અને તેનો લાભ લઈને સ્કોર્પિયો સવાર ચોર ફરાર થઈ ગયા હતા.

ચોરીની ઘટના બાદ ડ્રાયવર તાત્કાલિક ૧૧૨ નંબર પર પોલીસને જાણ કરી દીધી હતી. પોલીસે ટ્રેલરની સાથે ડ્રાઈવરને આશિયાના પોલીસ સ્ટેશન લઈ ગઈ હતી. ભારતીય સેના સાથે મામલો સંકળાયેલો હોવાને કારણે તેની સંવદેનશીલતા જોતાં પોલીસ દ્વારા તાત્કાલિક ફરિયાદ દાખલ કરીને તપાસ શરૂ કરી દેવામાં આવી હતી. પણ હજુ સુધી પોલીસને કોઈ સફળતા મળી નથી. આશિયાના પોલીસ સ્ટેશનના પોલીસ ઈન્સ્પેકટર ધીરજ શુકલાએ જણાવ્યું કે શહીદ પથથી લઈને આસપાસના તમામ રસ્તાઓના સીસીટીવી ફૂટેજની તપાસ કરવામાં આવી રહી છે.

ડ્રાઈવર હેમસિંહે બાકીના ૪ ટાયર લઈને ૩૦ નવેમ્બરે જોધપુરના એરબેઝ પહોંચ્યો ગતો. જયાં એરફોર્સની પોલીસ દ્વારા હેમસિંહની ધરપકડ કરી લેવામાં આવી હતી અને તેના ટ્રેલરથી ફાઈટર પ્લેનના સ્પેયર્સનું ટ્રાન્સપોર્ટેશન થાય છે. સેનાને આશંકા છે કે કોઈ દુશ્મનના ષડયંત્ર હેઠળ ટાયરની ચોરી થઈ છે. ઓફિસરોનું કહેવું છે કે ગાડી હેમસિંહની છે. તે અનેક વર્ષોથી સેના સાથે સંકળાયેલો છે. એરબેઝ અને સેનાના સંવેદનશીલ વિસ્તારોમાં તેની પહોંચ રહે છે. જે ટાયરની ચોરી થઈ છે તે પ્લેન સિવાય કયાંય ઉપયોગ થતો નથી. અને આ રીતે ટાયર ચોરી થવાની ઘટના શંકાસ્પદ છે.