Gujarati News

નવી દિલ્‍હી, તા.૩: તાજેતરમાં કોમ્‍પ્‍ટ્રોલર એન્‍ડ ઓડિટર જનરલ (કેગ)ના રિપોર્ટમાં રેલવેની કથળેલી હાલતનો ખુલાસો કરવામાં આવ્‍યો છે. આ રિપોર્ટ મુજબ ભારતીય રેલવેની કમાણી વિતેલા ૧૦ વર્ષના સૌથી નીચલા સ્‍તરે પહોંચી છે. રેલવેનો ઓપરેટિંગ રેશિયો નાણાકીય વર્ષ ૨૦૧૭-૧૮માં ૯૪૮.૪૪ ટકાએ પહોંચી ગયો છે. જેનો સીધો અર્થ થાય છે કે, રેલવે દ્વારા ૧૦૦ રુપિયા કમાવવા માટે ૯૮.૪૪ રુપિયાનો ખર્ચ કરવામાં આવ્‍યો છે.

રેલવે ઓપરેટિંગ રેશિયોના આંકડા મુજબ એ સ્‍થિતિનો ખુલાસો થયો છે જેમાં રેલવેને તેના તમામ સંશાધનો પર બે ટકાની કમાણી પણ થઇ નથી રહી. રેલવેનો ઓપરેટિંગ રેશિયો ૨૦૧૭-૧૮માં ૯૮.૪૪ ટકા રહેવા પાછળનું મુખ્‍ય કારણ ગત વર્ષના ૭.૬૩ ટકા મેનજમેન્‍ટ ખર્ચની સરખામણીએ ૧૦.૨૯ ટકા ઊચ્‍ચ વૃદ્ધિ દર થવાનું છે.

રિપોર્ટમાં જણાવાયું છે કે નાણાકીય વર્ષ ૨૦૦૮-૦૯માં રેલવેનો ઓપરેટિંગ રેશિયો ૯૦.૪૮ ટકા હતો, જે ૨૦૦૯-૧૦માં ૯૫.૨૮ ટકા, ૨૦૧૦-૧૧માં ૯૪.૫૯ ટકા, ૨૦૧૧-૧૨માં ૯૫.૮૫ ટકા, ૨૦૧૨-૧૩માં ૯૦.૧૯ ટકા, ૨૦૧૩-૧૪માં  ૯૩.૬ ટકા, ૨૦૧૪-૧૫માં  ૯૧.૨૫ ટકા, ૨૦૧૫-૧૬માં  ૯૦.૪૯ ટકા, ૨૦૧૬-૧૭માં ૯૬.૫ ટકા અને ૨૦૧૭-૧૮માં ૯૮.૪૪ ટકા નોંધાયો છે.

કેગના રિપોર્ટમાં ભલામણ કરાઇ છે કે રેલવેની આંતરિક મહેસૂલી આવક વધારવા માટે ઉપાય કરવા જોઇએ, જેથી કુલ અને વધારાના અંદાજપત્રીય સંશાધનો પર નિર્ભરતા અટકાવી શકાય. આમાં ભલામણ કરાઇ છે કે ચાલુ નાણાકીય વર્ષ દરમિયાન રેલવે દ્વારા કરાયેલા મૂડીગત ખર્ચમાં કાપ મુકાયો છે. રેલવેએ ગત બે વર્ષમાં આઇબીઆર-આઇએફ હેઠલ એકત્ર કરાયેલા પૈસાને ખર્ચ કરી શકી નથી. રિપોર્ટમાં કહેવાયું છે કે રેલવે બજારથી મળેલા ભંડોળનો સંપૂર્ણરીતે ઉપયોગ કરવાનું સુનિશ્ચિત કરે.

કેગે ભલામણ કરી છે કે રેલવેએ તેની આંતરિક રેવેન્‍યૂ વધારવા માટે પગલા લેવાની જરૂર છે. આથી કુલ અને વધારાના અંદાજપત્રીય સંશાધનો પરની નિર્ભરતા અંકુશમાં લઇ શકાય તેમ છે. આ ઉપરાંત દ્યસારાપેટે ઓછી જોગવાઇ કરવાથી જૂની અસ્‍કયામતના રિન્‍યૂઅલને લગતા કામોમાં ભરાવો થઇ જાય છે. આ બેકલોગને ખત્‍મ કરવા અને સમયસર રિપ્‍લેસમેન્‍ટની તાકીદની જરૂર છે. તેણે કોઇ યોગ્‍ય કારણ વગર નવી ભંડોળ ઉભી કરવાથી બચવાની પણ રેલવેને સલાહ આપી છે.